کیف (لارڈ میڈیا): روس نے یوکرین کے دارالحکومت کیف اور اس کے گرد و نواح پر میزائل اور ڈرونز سے بڑے حملے کیے جن میں کم از کم 15 افراد ہلاک اور درجنوں زخمی ہو گئے۔ کیف کی فوجی انتظامیہ کے مطابق حملے کے دوران بیلسٹک میزائل اور ڈرون رہائشی علاقوں اور دیگر تنصیبات پر گرے، جس کے باعث آگ بھڑک اٹھی اور تباہی ہوئی۔
کیف کی فوجی انتظامیہ نے بتایا کہ دارالحکومت میں ایک خاتون جاں بحق اور 24 افراد زخمی ہوئے، جبکہ شہر کے مختلف اضلاع میں آگ لگنے کے واقعات پیش آئے اور رہائشی عمارتوں کو نقصان پہنچا۔
کیف کے گرد و نواح میں حملوں کے نتیجے میں مزید 14 افراد ہلاک اور 20 سے زائد زخمی ہوئے۔ کیف ریجن کی فوجی انتظامیہ کے سربراہ تیمور تکاچینکو نے بتایا کہ یہ حالیہ مہینوں کے سب سے تباہ کن حملوں میں سے ایک تھا۔
یوکرینی حکام نے کہا ہے کہ روس نے جان بوجھ کر شہری آبادی اور سول انفراسٹرکچر کو نشانہ بنایا ہے۔ یوکرین نے خبردار کیا کہ روس کو ان حملوں کا جواب دینا پڑے گا۔
روس اور یوکرین کے درمیان طویل فاصلے تک مار کرنے والے میزائلوں کے حملوں میں اضافہ ہوا ہے۔ جولائی کے دوران روس نے میزائلوں کی تعداد میں اضافہ کیا۔
روسی حکام نے دعویٰ کیا کہ یوکرین نے ماسکو پر ڈرون حملے کیے۔ ماسکو کے میئر کے مطابق فضائی دفاعی نظام نے 10 یوکرینی ڈرون تباہ کیے۔
یوکرینی صدر ولودیمیر زیلنسکی نے مغربی اتحادیوں سے مزید پیٹریاٹ فضائی دفاعی نظام فراہم کرنے کا مطالبہ کیا تاکہ شہری آبادی کا تحفظ کیا جا سکے۔
