کراچی (لارڈ میڈیا): وزیراعلیٰ سندھ سید مراد علی شاہ نے ڈیجیٹل سندھ منصوبے کے تحت 3 جدید صوبائی ڈیٹا سینٹرز کے قیام کا حکم دیتے ہوئے جامع منصوبہ تیار کرنے کی ہدایت کی ہے۔ یہ فیصلہ این ٹی سی کے منیجنگ ڈائریکٹر میجر جنرل ریٹائرڈ علی فرحان کے ساتھ اجلاس میں کیا گیا۔ اجلاس میں سندھ حکومت اور این ٹی سی کے درمیان ٹیلی کمیونیکیشن، ڈیٹا مینجمنٹ، کلاؤڈ سروسز اور سائبر سیکیورٹی پر تعاون کا جائزہ لیا گیا۔
وزیراعلیٰ سندھ کو این ٹی سی کے ملک بھر میں موجود انفارمیشن اینڈ کمیونیکیشن ٹیکنالوجی انفرا اسٹرکچر پر بریفنگ دی گئی اور جاری سرکاری منصوبوں و ملک بھر میں ڈیٹا سینٹرز کی توسیع کے منصوبوں سے آگاہ کیا گیا۔ این ٹی سی کے ڈیٹا سینٹرز سرکاری اداروں کو محفوظ ہوسٹنگ، کلاؤڈ کمپیوٹنگ، ڈیزاسٹر ریکوری اور ڈیٹا تحفظ کی خدمات فراہم کر رہے ہیں۔
وزیراعلیٰ سندھ نے کہا کہ سندھ ڈیجیٹل گورننس اور ٹیکنالوجی پر مبنی عوامی انتظامیہ کے نئے دور میں داخل ہو رہا ہے۔ سرکاری ڈیٹا قومی اثاثہ ہے، اس کا تحفظ، انتظام اور دستیابی مؤثر حکمرانی کے لیے انتہائی اہم ہے۔ صوبائی ڈیٹا سینٹر سرکاری محکموں کے لیے محفوظ ڈیٹا اسٹوریج، کلاؤڈ سروسز اور کاروباری تسلسل کی سہولیات فراہم کرے گا۔
انہوں نے کہا کہ مرکزی ڈیٹا سینٹر سے آپریشنل خطرات کم اور مختلف سرکاری محکموں کے درمیان رابطہ کاری بہتر ہوگی۔ منصوبے کے تحت سندھ کے دیہی اور دور دراز علاقوں تک تیز رفتار انٹرنیٹ رابطہ فراہم کرنے کا منصوبہ ہے۔ یہ منصوبہ سیف سٹی منصوبے میں جدید نگرانی اور قانون نافذ کرنے والے اداروں کے لیے حقیقی وقت میں ڈیٹا پراسیسنگ میں مدد دے گا۔
وزیراعلیٰ سندھ نے منصوبہ بندی و ترقیاتی بورڈ، محکمہ انفارمیشن ٹیکنالوجی اور این ٹی سی کو مشترکہ طور پر تفصیلی روڈ میپ تیار کرنے کی ہدایت دی۔ انہوں نے ڈیٹا سینٹر کو سائبر سیکیورٹی، ڈیٹا تحفظ اور ڈیزاسٹر ریکوری کے عالمی معیار کے مطابق بنانے کی ہدایت کی۔
