جرمنی (لارڈ میڈیا): جرمنی میں منعقدہ سارلینڈ ٹروفیو جونیئرز سائیکل ریس کے دوران ایک بزرگ خاتون کی اسکوٹی نے اچانک ریس کے راستے میں آ کر حادثہ پیدا کر دیا۔ اس واقعے میں متعدد سائیکلسٹ گر پڑے مگر خوش قسمتی سے کوئی سنگین چوٹ نہیں آئی۔
یہ ریس اتوار کو منعقد ہوئی جس میں یورپ بھر سے 100 سے زائد نوجوان سائیکلسٹ شریک تھے۔ واقعے کی ویڈیو سوشل میڈیا پر وائرل ہو چکی ہے جس میں دیکھا جا سکتا ہے کہ خاتون تماشائیوں کے درمیان سے اپنی اسکوٹی کو سڑک کی جانب لے آئیں۔
حادثے کے نتیجے میں ایک سائیکلسٹ تو بچنے میں کامیاب رہا لیکن اس کے پیچھے آنے والا سائیکلسٹ ٹکرا گیا، جس سے مزید سائیکلسٹ بھی گر پڑے۔
ڈچ سائیکلسٹ پال فریزمین نے سوشل میڈیا پر بتایا کہ یہ واقعہ خطرناک تھا لیکن خوش قسمتی سے زیادہ زخمی نہیں ہوئے۔ رپورٹوں کے مطابق تمام سائیکلسٹ سنگین چوٹوں سے محفوظ رہے۔
مبصرین نے شائقین کو خبردار کیا ہے کہ وہ حفاظتی حدود سے باہر نہ آئیں کیونکہ تیز رفتار ریسوں میں معمولی غلطی بھی بڑے حادثے کا سبب بن سکتی ہے۔
