تہران (شِنہوا) ایرانی وزارت خارجہ کے ترجمان اسماعیل بقائی نے کہا ہے کہ امریکہ نے جنگ کے خاتمے کے لئے ایران کے 14 نکاتی مجوزہ منصوبے کا جواب دے دیا ہے۔
ترجمان نے سرکاری ٹی وی آئی آر آئی بی کو انٹرویو دیتے ہوئے مزید بتایا کہ امریکی جواب کا جائزہ لیا جا رہا ہے۔
انہوں نے زور دیا کہ ایران کا منصوبہ صرف جنگ کے خاتمے پر مرکوز ہے اور اس میں جوہری شعبے کی تفصیلات سے متعلق کچھ بھی شامل نہیں ہے۔
بقائی نے مزید کہا کہ اس وقت ہماری توجہ خطے میں جنگ کے خاتمے سے متعلق نکات پر ہے، جن میں لبنان بھی شامل ہے اور واضح کیا کہ اس مرحلے پر ہمارے کوئی جوہری مذاکرات نہیں ہو رہے۔
اتوار کو ایرانی وزیر خارجہ سید عباس عراقچی نے اپنے عمانی اور جرمن ہم منصبوں کو جنگ کے خاتمے کے لئے ایران کی تازہ سفارتی کوششوں اور اقدامات سے آگاہ کیا۔
ایرانی وزارت خارجہ کے جاری کردہ بیانات کے مطابق عراقچی نے ٹیلی فون پر الگ الگ رابطوں میں عمان کے وزیر خارجہ سید بدر بن حمد بن حمود البوسعیدی اور جرمنی کے وزیر خارجہ جوہان ویڈفل کے ساتھ خطے اور عالمی سطح کی تازہ صورتحال پر تبادلہ خیال کیا۔
