اسلام آباد: صدر آصف زرداری نے قوم کو نئے سال کے آغاز پر مبارکباد دیتے ہوئے کہا ہے کہ بحیثیت قوم گزشتہ سال کی کامیابیوں وناکامیوں کا جائزہ لینے، ماضی سے سبق حاصل کرنے کی ضرورت ہے، نوجوانوں کو مواقع فراہم کرکے ان کی صلاحیتوں کو نکھارنے پر سرمایہ کاری کرنا ہوگی۔
سال نو کے آغاز پر صدر آصف علی زرداری نے پاکستانی قوم اور عالمی برادری کو مبارکباد دیتے ہوئے دعا کی ہے کہ نیا سال پاکستانی قوم کیلئے امن، استحکام، ترقی اور خوشحالی لیکر آئے۔ انہوںنے کہا کہ ملک کو درپیش چیلنجز سے نکالنے کیلئے یکجہتی، نظم و ضبط، مسلسل محنت اور لگن کے ساتھ کام کرنا ہوگا، پاکستان کے نوجوانوں کو مواقع فراہم کرکے ان کی صلاحیتوں کو نکھارنے پر سرمایہ کاری کرنا ہوگی۔
انہوں نے کہا کہ پاکستان کو مضبوط بنانے کیلئے غریب طبقے کی ترقی پر توجہ مرکوز کرنا ہوگی، بحیثیت قوم گزشتہ سال کی کامیابیوں اور ناکامیوں کا جائزہ لینے، ماضی سے سبق حاصل کرنے کی ضرورت ہے، سال کے آغاز پر عوامی خدمت، امن و استحکام کیلئے محنت سے کام کرنے کا عزم کرنا ہوگا۔ انہوں نے کہا کہ اللہ تعالی سے دعا ہے نیا سال ملک کیلئے کامیابیوں کا سال ہو۔
