نیپلز (لارڈ میڈیا): اٹلی کے جنوبی شہر نیپلز کے قریب کیمپی فلیگری کے علاقے میں جمعے کی شام 4.7 شدت کے زلزلے کے باعث بجلی کی فراہمی متاثر ہوئی، ٹرین اور میٹرو سروس عارضی طور پر معطل کر دی گئی جبکہ بعض عمارتوں کو معمولی نقصان پہنچا۔ فوری طور پر کسی جانی نقصان کی اطلاع نہیں ملی۔
اٹلی کے قومی ادارہ برائے ارضیات و آتش فشانیات کے مطابق زلزلہ مقامی وقت کے مطابق شام 7 بج کر 46 منٹ پر ریکارڈ کیا گیا۔ اس کا مرکز نیپلز کے مغرب میں واقع کیمپی فلیگری کا آتش فشانی علاقہ تھا، جبکہ اس کی گہرائی تقریباً 3 کلومیٹر تھی۔
اطالوی فائر سروس نے کہا ہے کہ نیپلز اور اس کے گرد و نواح میں بعض عمارتوں کو معمولی نقصان پہنچنے کی اطلاعات ہیں، تاہم کسی رہائشی کو بچانے یا ہنگامی امداد کے لیے فوری درخواست موصول نہیں ہوئی۔
مقامی حکام نے احتیاطی تدابیر کے تحت ریلوے اور میٹرو سروس عارضی طور پر معطل کر دی، جبکہ مختلف علاقوں میں بجلی کی فراہمی بھی متاثر رہی۔ کیمپی فلیگری کے علاقے میں زلزلوں کی سرگرمی میں اضافہ دیکھا گیا ہے، جس کے باعث حکومت نے نگرانی اور حفاظتی اقدامات مزید سخت کر دیے ہیں۔
ماہرین کے مطابق حالیہ جھٹکوں نے 1980 کی دہائی کے اوائل میں آنے والے زلزلوں کی یاد تازہ کر دی ہے جب ہزاروں افراد کو اپنے گھر چھوڑنے پڑے تھے۔ اٹلی زلزلہ خیز ممالک میں شمار ہوتا ہے اور 2016 میں وسطی اٹلی میں آنے والے زلزلوں نے بڑے پیمانے پر تباہی مچائی تھی۔
