واشنگٹن (لارڈ میڈیا): سعودی وزیر دفاع شہزادہ خالد بن سلمان نے وائٹ ہاؤس میں امریکی نائب صدر جے ڈی وینس سے ملاقات کی۔ یہ ملاقات عراق میں ایران نواز گروپوں کے خلاف امریکا اور سعودی عرب کے مشترکہ فضائی حملوں کے بعد ہوئی۔ سعودی عرب نے ایران کے ساتھ کشیدگی میں اضافے کے بجائے تناؤ کم کرنے کی پالیسی پر زور دیا ہے۔
سعودی وزیر دفاع نے امریکی نائب صدر کو بتایا کہ عراق کی ایران نواز ملیشیاؤں کی جانب سے سعودی بنیادی ڈھانچے اور توانائی کی تنصیبات پر حملے ریڈ لائن عبور کرنے کے مترادف تھے، جس کے بعد سعودی عرب کے پاس جواب دینے کے سوا کوئی چارہ نہیں تھا۔
ذرائع کے مطابق، ملاقات کا مقصد سعودی ولی عہد شہزادہ محمد بن سلمان کا ایران کے ساتھ جاری جنگ اور خطے کی صورتحال سے متعلق خصوصی پیغام امریکی نائب صدر تک پہنچانا تھا۔ سعودی عرب کے مطابق کشیدگی میں کمی ہی زیادہ مؤثر اور نتیجہ خیز راستہ ہے۔
ولی عہد محمد بن سلمان نے واضح کیا کہ عراق میں کیے گئے حملوں کا مقصد جنگ کو وسعت دینا نہیں بلکہ سعودی عرب کی دفاعی صلاحیت اور اپنے تحفظ کے عزم کا اظہار تھا۔
