اسلام آباد (لارڈ میڈیا): پاکستان شوبز انڈسٹری کے معروف میزبان و اداکار توثیق حیدر اور فرح سعدیہ نے اپنی شادی سے متعلق خبروں کو سختی سے جھوٹا اور بے بنیاد قرار دیا ہے۔ حالیہ دنوں میں سوشل میڈیا اور یوٹیوب پر یہ افواہیں پھیل رہی تھیں کہ دونوں نے شادی کر لی ہے۔
توثیق حیدر اور فرح سعدیہ نے ایک ویڈیو جاری کر کے وضاحت کی کہ یہ خبریں محض ویوز اور پیسے کمانے کے لیے پھیلائی گئیں۔ ویڈیو میں انہوں نے طنزیہ انداز میں کہا کہ ان کی شادی کی خبر یوٹیوبرز نے پہلے ہی بریک کر دی۔
توثیق حیدر نے مذاق میں کہا کہ انہیں صبح اٹھ کر معلوم ہوا کہ ان کی شادی ہو چکی ہے۔ انہوں نے یوٹیوبرز کو مخاطب کرتے ہوئے کہا کہ اگر انہوں نے جھوٹی خبر سے کمائی کی ہے تو اس کا کچھ حصہ انہیں بھی دیا جائے۔
فرح سعدیہ نے سنجیدہ انداز میں کہا کہ ایسی افواہیں ان کے خاندان کے لیے پریشانی کا باعث بنتی ہیں۔ انہوں نے واضح کیا کہ وہ دونوں اکیلے ہیں اور خوش ہیں۔
دونوں فنکاروں نے کہا کہ وہ صرف اچھے دوست ہیں اور ان کے درمیان صرف پیشہ ورانہ تعلق ہے۔ ویڈیو کے بعد یہ واضح ہو گیا کہ ان کی شادی کی خبریں محض افواہ تھیں۔
توثیق حیدر اور فرح سعدیہ طویل عرصے سے پی ٹی وی سے وابستہ ہیں اور مارننگ شوز کے ذریعے اپنے مداحوں میں مقبول ہیں۔ انہوں نے مختلف ڈراموں میں بھی کام کیا ہے۔
