واشنگٹن (لارڈ میڈیا): پاکستانی مینوفیکچرڈ فیفا 2026 فٹبال اب میدان کے بعد خلا تک پہنچ گئی ہے۔ امریکی خلائی تحقیقاتی ادارے ناسا کے خلابازوں نے بین الاقوامی خلائی اسٹیشن (آئی ایس ایس) پر فیفا ورلڈکپ کی جدید فٹبال کے ساتھ ایک سائنسی تجربہ کیا۔
یہ تجربہ اسٹیشن کے اندر خاص طور پر کپولا ماڈیول میں کیا گیا جہاں فٹبال کو بغیر وزن کے ماحول میں تیرتے ہوئے دیکھا گیا۔
خلابازوں نے ایڈیڈاس کی ڈیزائن کردہ ٹریونڈا بال کا استعمال کیا تاکہ یہ مطالعہ کیا جا سکے کہ فٹبال مائیکرو گریویٹی میں کیسے برتاؤ کرتی ہے۔
اس تجربے کا مقصد یہ سمجھنا تھا کہ فٹبال کا بیلنس اور وزن کھیل کے دوران اس کی حرکت کو کیسے متاثر کرتا ہے۔ ناسا کی جانب سے بتایا گیا ہے کہ وہ یہ تجربہ 2019 میں بھی کرچکے ہیں۔
تجربے سے ظاہر ہوا ہے کہ توازن میں فرق کس طرح فٹبال کی حرکت کو بدل سکتا ہے۔
فیفا کے مطابق، ٹریونڈا نام ہسپانوی لفظ سے آیا ہے جس کا مطلب ‘تین لہریں’ ہیں، جو 3 ممالک امریکا، کینیڈا اور میکسیکو میں منعقد ہونے والے ورلڈ کپ کی عکاسی کرتی ہیں۔
ایڈیڈاس کی تیار کردہ ٹریونڈا کو 2026 کے فیفا ورلڈ کپ کے دوران استعمال کیا جا رہا ہے۔
