اسلام آباد: نائب وزیراعظم اسحاق ڈار نے قومی معیشت میں کپاس کے مرکزی کردار کی بحالی ،کاشتکاروں کیلئے فصل منافع کو بہتر بنانے کیلئے مربوط اقدامات پر زور دیا ہے۔ ترجمان دفتر خارجہ کی جانب سے جاری بیان کے مطابق بدھ کو وزیر خارجہ کی زیر صدارت ضروری اور نقد آور فصلوں سے متعلق کابینہ کمیٹی کے تیسرے اجلاس کا انعقاد ہوا جس میں وزارت قومی غذائی تحفظ و تحقیق ، خزانہ اور منصوبہ بندی کے وزرا ، وزیر اعظم کے معاون خصوصی طارق باجوہ سمیت وزارت قومی غذائی تحفظ و تحقیق ، وزارت تجارت اور ایف بی آر کے اعلی حکام نے شرکت کی۔
اجلاس میں کاٹن پلان 2025-26ء کا تفصیلی جائزہ لیا اور پاکستان میں کپاس کے شعبے کی بحالی کیلئے ضروری ، فوری ، وسط و طویل المدتی پالیسی اقدامات پر غور کیاگیا۔نائب وزیراعظم نے قومی معیشت میں کپاس کے مرکزی کردار کی بحالی ،کاشتکاروں کیلئے فصل منافع کو بہتر بنانے کیلئے مربوط و قابل عمل اقدامات کی ضرورت پر زور دیتے ہوئے وزارت نیشنل فوڈ سکیورٹی اینڈ ریسرچ کو ہدایت کی کہ آئندہ ہفتے فالو اپ اجلاس بلایاجائے جس میں کاٹن ویلیو چین کے متعلق تمام سرکاری اور نجی شعبے کے شراکت داروں کو شرکت کی دعوت دی جائے اور سفارشات پرموثر عملدرآمد کو یقینی بنانے کیلئے قابل عمل تجاویز بھی پیش کی جائیں۔
کمیٹی نے 2025ء کیلئے گندم کے پیداواری تخمینہ جات ، کیری فارورڈ سٹاک اور سال 2025-26ء کیلئے گندم کی قومی ضروریات کا جائزہ لیتے ہوئے کہا کہ گندم کی آئندہ کٹائی تک قومی طلب کو پورا کرنے کیلئے گندم کا وافر ذخیرہ موجود ہے۔
