ریاض (لارڈ میڈیا): سعودی عرب میں ایشیائی جنگلی گدھے کے بچے کی پیدائش کی خبر سامنے آئی ہے، جو 100 سال بعد پہلی بار ہوئی ہے۔ یہ اعلان اس وقت کیا گیا جب نر بچے نے اپنی زندگی کے پہلے 12 ماہ کامیابی سے مکمل کر لیے۔
یہ کامیابی شہزادہ محمد بن سلمان شاہی ریزرو میں حاصل ہوئی، جہاں جون 2025 میں اس نایاب نسل کے بچے کی پیدائش ہوئی تھی۔ ماہرین کا کہنا ہے کہ جنگلی گدھوں کے بچوں کے لیے پہلا سال انتہائی نازک ہوتا ہے۔
یہ منصوبہ جزیرہ نما عرب کی جنگلی حیات کی بحالی کے پروگرام کے تحت عمل میں آیا، جس کا مقصد مقامی انواع کو ان کے تاریخی قدرتی مساکن میں دوبارہ آباد کرنا ہے۔
ریزرو کے چیف ایگزیکٹو آفیسر اینڈریو زالومیس نے بتایا کہ یہ پیش رفت اردن کے رائل سوسائٹی فار دی کنزرویشن آف نیچر کے ساتھ شراکت داری کا نتیجہ ہے، جس کے تحت ایشیائی جنگلی گدھوں کو اردن سے سعودی عرب منتقل کیا گیا۔
ریزرو میں اس وقت پانچ ماداؤں اور تین نر جانوروں کا ریوڑ موجود ہے۔ مزید دو بچوں کی پیدائش متوقع ہے، جو تحفظ کی کوششوں کی کامیابی کا ثبوت ہوگی۔
