اسلام آباد (لارڈ میڈیا): وزیراعظم شہباز شریف نے معروف صنعتکاروں اور کاروباری شخصیات کے وفد سے ملاقات کی، جس کا مقصد ملک کی معاشی ترقی تیز کرنے اور مالی سال 2026-2027 کے بجٹ کے حوالے سے مشاورت کرنا تھا۔
وفد میں میاں محمد منشا، عارف حبیب، عاطف باجوہ سمیت دیگر ممتاز کاروباری شخصیات شامل تھیں۔ وزیراعظم نے کاروباری برادری کو ملکی معیشت کی اہمیت اور ان کی شراکت داری کی ضرورت پر زور دیا۔
وزیراعظم نے کہا کہ برآمدات پر مبنی ترقی ہماری معاشی پالیسی کا محور ہے اور غیر رسمی معیشت کو ٹیکس نیٹ میں لانے کے لئے اقدامات کیے جا رہے ہیں۔
انہوں نے مزید کہا کہ بجٹ میں عوام کو ریلیف دینے کے لئے اقدامات شامل کیے جا رہے ہیں اور کاروبار دوست پالیسیوں کی بدولت ملکی معیشت مستحکم ہوئی ہے۔
وزیراعظم نے صنعت، زراعت، اور انفارمیشن ٹیکنالوجی کے شعبوں میں ترقی کو معیشت کے استحکام کے لئے اہم قرار دیا اور بتایا کہ نوجوانوں کے لئے تکنیکی و فنی تربیت کے پروگرام شروع کیے جا رہے ہیں۔
وفد کو حکومتی اقدامات پر بریفنگ دیتے ہوئے ٹیکس ٹریبونلز اور اسپیشل کمرشل کورٹس کے قیام کی معلومات فراہم کی گئیں۔
وفد نے وزیراعظم کی قیادت میں معاشی بحالی کے اقدامات کو سراہا اور کاروبار و سرمایہ کاری کے لئے موزوں ماحول فراہم کرنے پر شکریہ ادا کیا۔
اجلاس میں وفاقی وزراء اور اعلیٰ سرکاری افسران نے بھی شرکت کی۔
