چھنگ دو (شِنہوا) صرف 30 سیکنڈ تک بغیر کسی جسمانی رابطے کے اس نئے ذہین ہیلتھ کیئر روبوٹ کے سامنے کھڑے ہوں اور یہ آپ کے دل کی دھڑکن، بلڈ پریشر اور جسمانی درجہ حرارت کی پیمائش کر لے گا۔ یہاں تک کہ یہ آپ کے 13 مختلف جذبات جیسے کہ خوشی، تھکن اور بے چینی تک کو سمجھنے کی صلاحیت رکھتا ہے۔
یہ کوئی سائنس فکشن نہیں بلکہ "کانگ باؤ” (ہیلتھ بے بی) نامی روبوٹ کی حقیقی کارکردگی ہے جس کے آزمائشی تجربات کا آغاز چین کے جنوب مغربی صوبے سیچھوان کے دارالحکومت چھنگ دو میں ہونے جا رہا ہے۔
یونیورسٹی آف الیکٹرانک سائنس اینڈ ٹیکنالوجی آف چائنہ (یو ای ایس ٹی سی) کی ایک تحقیقی ٹیم نے اسے تیار کیا ہے۔ کانگ باؤ ایک ایسا معاون ہیلتھ کیئر روبوٹ ہے جو نالج ہائپرگراف پر مبنی خودکار فیصلہ سازی کے نظام پر کام کرتا ہے۔
1.2 میٹر بلند اس روبوٹ کا سر گول اور دھڑ چوکور ہے جس پر رجسٹریشن، ٹیسٹ کا آغاز اور نتائج دیکھنے کے لئے 3 بٹن لگائے گئے ہیں۔
یہ روبوٹ انفراریڈ شعاعوں اور رگوں میں خون کی گردش کے تجزیے کی مدد سے چند سیکنڈز میں طبی ٹیسٹ مکمل کر لیتا ہے۔ صارف کی رازداری کو مکمل تحفظ دینے کے لئے تمام معلومات کلاؤڈ پر بھیجنے کے بجائے روبوٹ کے اندر ہی پراسیس کی جاتی ہیں۔
لیبارٹری کے ڈائریکٹر تیان لنگ کے مطابق متعدد الگورتھمز کی بہتری اور ڈیٹا کی تصدیق کے بعد کانگ باؤ نے جسمانی پیمائش میں 97 فیصد سے زائد اور جذبات کی شناخت میں 92 فیصد سے زیادہ درستگی حاصل کر لی ہے جو اس صنعت میں نمایاں سطح ہے۔
تیان نے کہا کہ سائنسی تحقیق کی اصل اہمیت یہ ہے کہ وہ لیبارٹری سے باہر نکل کر حقیقی معنوں میں معاشرے کی خدمت کرے اور لوگوں کی زندگیوں کو بہتر بنائے۔
