آسٹریلیا کے سابق کپتان مائیکل کلارک اور ایرون فنچ نے ٹی 20ورلڈ کپ کیلئے پاکستانی سکواڈ میں فاسٹ بالر حارث رؤف کے منتخب نہ ہونے پر حیرانی کا اظہار کیا ہے اور ایک پروگرام میں اس حوالے سے ایک سوال کے جواب میں ایرون فنچ نے کہا کہ حارث رؤف کے سکواڈ میں شامل نہ ہونے پر کافی حیرت ہوئی، حارث رؤف ٹیم میں ایکس فیکٹر لیکر آتے ہیں بس کبھی کبھار حارث رؤف تھوڑے مہنگے ثابت ہوتے ہیں۔
فنچ کا کہنا تھا سب سے اہم بات یہ ہے کہ آپ کے پاس کھیل کے تینوں مرحلے میں وکٹیں لینے والا حقیقی بالر ہو اور میرے نزدیک ٹی 20 کرکٹ میں وکٹیں لینا سب سے اہم ہوتا ہے، خاص طور پر فلیٹ پچز پر۔
اس موقع پر گفتگو کرتے ہوئے مائیکل کلارک نے کہا کہ مجھے بھی حارث رؤف کی سلیکشن نہ ہونے پر حیرت ہوئی، ہاں البتہ یہ بات بھی ہے کہ آسٹریلیا میں کھیلنا سری لنکا اور بھارت میں کھیلنے سے مختلف ہے، جہاں آپ نے کھیلنا ہوتا ہے وہاں کی کنڈیشن کے حساب سے سکواڈ بنانا ہوتا ہے اور کھلاڑی کو ان کے رول کے حساب سے ٹیم میں سلیکٹ کیا جاتا ہے، جو رول بی بی ایل میں حارث رؤف کا تھا وہ انکا یہاں نہیں لگتا اور میرے خیال میں کھلاڑی کی فارم بھی کافی اہم ہوتی ہے۔
مائیکل کلارک نے کہا کہ جب آپ ورلڈ کپ کیلئے سکواڈ منتخب کرتے ہیں تو آپ کوشش کرتے ہیں کہ کھلاڑی ٹورنامنٹ میں اچھی کرکٹ کیساتھ اچھی فارم کے ساتھ آئیں۔
