معروف بھارتی اداکارہ عالیہ بھٹ نے اپنی شادی کے لباس سے متعلق دلچسپ انکشافات کرتے ہوئے بتایا ہے کہ میں نے اپنی شادی کے دن روایتی سرخ لباس کے بجائے ہلکے رنگ کی ساڑھی پہننے کا فیصلہ صرف اسلئے کیا تھا کیونکہ میں خود کو آرام دہ اور پراعتماد محسوس کروانا چاہتی تھی، میں خود کو ساڑھی میں سب سے زیادہ آرام دہ محسوس کرتی ہوں، سبیا ساچی کیساتھ پہلی بات چیت میں ہی میں نے واضح کردیا تھا کہ میں اپنی شادی میں ساڑھی ہی پہننا چاہتی ہوں اور میرے لئے سب سے اہم چیز پرسکون رہنا ہے۔
انہوں نے کہا کہ جب رنگ کے بارے میں بات ہوئی تو انہوں نے سفید اور سنہری رنگ کی ساڑھی کی خواہش کا اظہار کیا جس پر سبیاساچی نے آرگنزا ساڑھی کا مشورہ دیا جو سادہ ہونے کے باوجود نہایت شاہانہ انداز میں بنائی گئی تھی، انکی ساڑھی میں ایک خاص ٹرین (لباس کا وہ لمبا پچھلا حصہ جو عموماً عروسی لباس، ساڑھی یا گائون کیساتھ پیچھے کی جانب زمین پر گھسٹتا ہوا نظر آتا ہے)شامل کی گئی تھی جس پر انکی شادی کی تاریخ اور ایک نہایت ذاتی اور خفیہ جملہ مسز ہپسٹر لکھا گیا تھا جس کا مطلب صرف عالیہ اور رنبیر کو ہی معلوم ہے۔
زیورات کے حوالے سے عالیہ بھٹ نے بتایا کہ انہوں نے سبیاساچی کا تیار کردہ بغیر تراشے ہیرے کا سیٹ پہنا تھا جس میں بڑا ہار، بڑے جھمکے اور مانگ ٹیکا شامل تھا۔
