محکمہ داخلہ پنجاب نے دہشتگردی اور امن عامہ کے خدشات کے پیش نظر صوبے میں دفعہ 144 کے نفاذ میں 15 نومبر توسیع کر دی ہے اور سات روز کی توسیع کا باقاعدہ نوٹیفکیشن بھی جاری کردیا ہے جس کے مطابق 4 یا زائد افراد کے عوامی مقامات پر جمع ہونے پر مکمل پابندی ہوگی، پنجاب بھر میں ہر قسم کے اسلحے کی نمائش پر مکمل پابندی عائد کی گئی ہے، لاؤڈ اسپیکر کے استعمال جبکہ اشتعال انگیز، نفرت آمیز یا فرقہ وارانہ مواد کی اشاعت و تقسیم پر مکمل پابندی ہے۔
پابندی کا اطلاق شادی کی تقریبات، جنازہ اور تدفین پر نہیں ہوگا جبکہ سرکاری فرائض کی انجام دہی پر موجود افسران و اہلکار اور عدالتیں بھی پابندی سے مستثنی ہیں۔
نوٹیفکیشن کے مطابق لاڈ اسپیکر صرف اذان اور جمعہ کے خطبے کیلئے استعمال کیے جا سکتے ہیں۔
نوٹیفکیشن میں کہا گیا ہے کہ سکیورٹی خطرات کے پیش نظر عوامی جلوس و دھرنا دہشتگردوں کیلئے آسان ہدف ہو سکتا ہے، شرپسند عناصر عوامی احتجاج کا فائدہ اٹھا کر اپنے مذموم عزائم کی تکمیل کیلئے ریاست مخالف سرگرمیاں کر سکتے ہیں۔
ذرائع کے مطابق عوامی آگاہی کیلئے دفعہ 144 کے نفاذ کی بڑے پیمانے پر تشہیر کی ہدایت کی گئی ہے۔
