اسلام آباد: سپیکر قومی اسمبلی سردار ایاز صادق نے کہا ہے کہ اپوزیشن نے چیف الیکشن کمشنر ، ممبران کیلئے کوئی نام نہیں دیئے، پارلیمنٹری افیئرز کو آگاہ کردیا، اگر ایوان جعلی ہے تو کیا چیئرمین قائمہ کمیٹی غیرقانونی نہیں؟، مذاکرات کے پرامید مگر یہ ذات سے ہٹ کر ملکی مفاد میں ہونے چاہئیں۔
میڈیا سے گفتگو کرتے ہوئے ایاز صادق نے کہا کہ حوالدار کہے جانے پر فخر ہے ایک چور پکڑتا ہے اور دوسرا شہید ہوتا ہے۔
انہوں نے کہا کہ اپوزیشن لیڈر کو عوام کے مسائل کی فکر نہیں، عمر ایوب نے الزام لگایا کہ انہیں بات کرنے کی اجازت نہیں دی جاتی، یہ بات کہہ کر انہوں نے سوا گھنٹے تقریر کی، کیا یہ کھلا تضاد نہیں؟ پھر ان کا الزام ہے کہ ان کے سوال نہیں لئے جاتے، میں اس حوالے سے ریکارڈ پیش کر سکتا ہوں، وہ ایوان میں نہیں آتے، ان کے توجہ دلا نوٹس ڈراپ ہو جاتے ہیں۔
انہوںنے کہا کہ اب میں رولز کے مطابق کام کروں گا، دو حکومتی اراکین کے بعد ایک اپوزیشن رکن کو بولنے کی اجازت دوں گا، تالی دو ہاتھ سے بجتی ہے، جب آپ ہاؤس میں ہوں گے نہیں اور احتجاج کرتے رہیں گے تو آپ کو موقع کم ہی ملے گا۔ انہوں نے کہا کہ اپوزیشن والے موجودہ ایوان کو غیر قانونی کہتے ہیں، ایوان اگر جعلی ہے تو کیا چیئرمین قائمہ کمیٹی غیر قانونی نہیں؟۔
انہوں نے کہا کہ ہم اب بھی پر امید ہیں کہ مذاکرات ہوں لیکن مذاکرات کسی ایک شخصیت کیلئے نہ ہوں، مذاکرات ذات سے ہٹ کر اور پاکستان کے مفاد میں ہونے چاہئیں، حکومت تو جواب دینا چاہتی تھی مگر اپوزیشن کو حکم ہوا کہ مذاکرات ختم کرنے ہیں اور جیسی ملاقات وہ چاہتے ہیں وہ بتا بھی نہیں سکتے۔
انہوں نے کہا کہ اپوزیشن نے چیف الیکشن کمشنر اور ممبران کیلئے کوئی نام نہیں دیئے، پارلیمنٹری افیئرز کو خط لکھ کر آگاہ کر دیا ہے۔ انہوں نے کہا کہ موسمیاتی تبدیلی بارے شجر کاری ضروری ہے جتنے درخت کاٹے گئے ہیں اتنے نئے پودے لگائے جائیں ۔
