اسلام آباد: سعودی عرب، قطر ، ملائیشیا سمیت 10 ممالک نے غیر قانونی داخلے، زائد المیعاد قیام سمیت مختلف خلاف ورزیوں پر139 پاکستانی شہریوں کو بے دخل کردیا۔ امیگریشن حکام کے مطابق گزشتہ 48 گھنٹوں کے دوران ملائشیا، عمان، سعودی عرب، قطر ،موریطانیہ اور سینیگال سمیت 10ممالک نے مزید 139پاکستانی شہریوں کو بے دخل کیا ہے جن میں سے 15کو کراچی میں گرفتار کرلیا گیا ہے۔
ذرائع کے مطابق عراق میں غیرقانونی طور پر داخل ہونے اور زائد المعیاد قیام پر 34پاکستانیوں کو بے دخل کیا گیا جن میں سے 2کو گوجرانوالہ پولیس کے حوالے کیا گیا ہے ۔ عمان سے 24شہریوں کو غیرقانونی طور پر ملک میں داخل ہونے پر بے دخل کیا گیا جن میں سے ایک شہری کا نام آئی بی ایم ایس بلیک لسٹ میں تھا جسے اے ایچ ٹی سی منتقل کیا گیا ہے جبکہ دیگر 2میں سے ایک کو لاڑکانہ اور دوسرے کو لاہور انتظامیہ کے حوالے کیا گیا ہے۔
حکام کے مطابق سعودی عرب میں بلیک لسٹ، منشیات، چوری، پاسپورٹ کے بغیر اور دیگر الزامات کے تحت 14افراد کو ڈی پورٹ کیا گیا ہے ۔ امارات میں منشیات، چوری، زائد المیعاد قیام، پاسپورٹ کھونے اور دیگر الزامات کے تحت سزا پانے والے 19ملزمان سمیت 31 ،ملائشیا میں غیر قانونی امیگریشن پر 8پاکستانیوں ، کینبرا ،ادیث ابابا اور قطر سے 9شہریوں کو رہائشی قوانین کی خلاف ورزی ،مفرور ہونے ،غیر قانونی کام کرنے یا آجر کی شکایت پر بے دخل کیا گیاہے۔امیگریشن حکام کے مطابق انسانی سمگلنگ کا شکار ہونے سے بچائے گئے 3افراد کو موریطانیہ اور 2کو سینیگال سے ڈی پورٹ کیا گیا جنہیں اے ایچ ٹی سی نے حراست میں لے لیا ہے۔
