الجیئرز (لارڈ میڈیا) الجیریا کے شمال مشرقی علاقوں میں جنگلاتی آگ کے باعث کم از کم 12 افراد ہلاک اور 54 زخمی ہو گئے ہیں۔ وزیر داخلہ سعید سیود نے کہا ہے کہ ہلاکتیں جیجل، بجایا اور تیزی وزو صوبوں میں ہوئیں۔
ملک بھر میں ایک ہی دن میں 154 مقامات پر آگ لگنے کی اطلاعات ملی ہیں۔ صوبہ بجایا سب سے زیادہ متاثر ہوا ہے جہاں 36 مقامات پر آگ لگی جن میں سے 18 پر قابو پا لیا گیا ہے۔
54 افراد جھلسنے کی وجہ سے زیرِ علاج ہیں جبکہ ان میں سے 6 کی حالت تشویشناک ہے۔ شدید متاثرہ علاقوں سے درجنوں خاندانوں کو محفوظ مقامات پر منتقل کر دیا گیا ہے۔
الجیریا شدید گرمی کی لہر کی زد میں ہے، جس کے باعث تیز ہوائیں اور بلند درجہ حرارت آگ کے پھیلاؤ کو تیز کر رہے ہیں۔ ماہرین کے مطابق موسمیاتی تبدیلی شمالی افریقہ میں جنگلاتی آگ کے خطرے کو بڑھا رہی ہے۔
