بیجنگ (شِنہوا) چین اپنے وسیع صنعتی بنیاد میں اشیاء کی ترسیل کا وقت اور لاگت گھٹانے کے لئے اعداد و شمار، خودکاری اور بہتر ذرائع نقل و حمل کے کثیر الجہتی روابط استعمال کرتے ہوئے اپنے نقل و حمل اور ترسیل کے نظام کو زیادہ جدید اور مربوط بنانے کی کوششیں تیز کر رہا ہے۔
چین کے جنوبی گوانگ شی ژوانگ خودمختار علاقے میں ستمبر میں کھلنے والی پھنگ لو نہر اسی عزم کی ایک عملی مثال ہے۔ چین کے جنوبی علاقوں سے آنے والے سامان کے لئے گوانگ ژو بندرگاہ کے راستے کے مقابلے میں یہ نیا راستہ سمندر تک اندرونی آبی سفر تقریباً 560 کلومیٹر تک مختصر کر دے گا جبکہ مجموعی نقل و حمل کی لاگت میں 18 سے 30 فیصد تک کمی کا تخمینہ لگایا گیا ہے۔
یہ نہر دریائے شی جیانگ سے خلیج بیبو تک 134.2 کلومیٹر پر محیط ہے۔ 5 ہزار ٹن تک بحری جہازوں کے لئے بنائے گئے اس منصوبے کا تخمینہ لاگت 72.7 ارب یوآن (10.7 ارب امریکی ڈالر) ہے اور یہ 1949 کے بعد قومی سطح پر ترتیب دیا گیا دریا سے سمندر تک کا چین کا پہلا نہری منصوبہ ہے۔
اس نہر پر بحری جہازوں کی آزمائش کا باضابطہ آغاز 12 اگست کو کیا گیا۔ ان آزمائشوں میں جہاز کے راستوں، نقل و حرکت، پانی کے بہاؤ اور جہازوں کے درمیان محفوظ فاصلے کے بارے میں اعداد و شمار اکٹھا کرنے کے لئے چین کے بیدو نیویگیشن سیٹلائٹ سسٹم کے ساتھ ساتھ ڈرونز اور سنسرز کا استعمال کیا جا رہا ہے۔
اس نہر کے دونوں کناروں پر تقریباً 262 کلومیٹر طویل تیز رفتار فائبر آپٹک کیبلز بچھائی گئی ہیں جنہیں ایک مخصوص فائیو جی نیٹ ورک اور ایج کمپیوٹنگ کے ساتھ منسلک کیا گیا ہے۔ جہازوں کی شناخت اور ویڈیو کے تجزیے کے امور اس جگہ کے قریب ہی انجام دیئے جا سکتے ہیں جہاں ڈیٹا پیدا ہوتا ہے جس سے شروع سے آخر تک کے ردعمل کا وقت ملی سیکنڈ کی سطح تک کم ہو جاتا ہے۔
پھنگ لو کینال ’نئی بین الاقوامی لینڈ سی ٹریڈ کوریڈور‘ کا ایک بنیادی منصوبہ ہے اور توقع ہے کہ اس سے چین کے جنوب مغربی علاقوں کی سمندر تک رسائی مزید بہتر ہوگی۔ رواں سال کے پہلے سات مہینوں میں جنوب مشرقی ایشیائی ممالک کی تنظیم کے ساتھ چین کی تجارت سالانہ بنیاد پر 20 فیصد اضافے کے ساتھ 51.4 کھرب یوآن تک پہنچ گئی ہے۔
قومی سطح پر نقل و حمل کا نظام چین کے 15 ویں پنج سالہ منصوبے (2026-2030) کے دوران 6 ترجیحی نیٹ ورکس میں سے ایک ہے جن میں آبی نیٹ ورک، جدید پاور گرڈز، کمپیوٹنگ پاور نیٹ ورکس، نیکسٹ جنریشن مواصلاتی نیٹ ورکس اور شہری زیر زمین پائپ لائن نیٹ ورکس شامل ہیں۔
