واشنگٹن (لارڈ میڈیا) یورپی ممالک کے سینئر سفارتکار آج امریکی محکمہ دفاع کے اعلیٰ پالیسی عہدیدار سے ملاقات کریں گے جس میں یورپ کی دفاعی صلاحیتوں کے اضافے کی یقین دہانی کرائی جائے گی۔
امریکی محکمہ دفاع کے پالیسی امور کے انڈر سیکرٹری ایلبرج کولبی برسلز میں نیٹو ممالک کے سفیروں کو اس جائزے پر بریفنگ دیں گے۔ یورپی حکام کو خدشہ ہے کہ یورپ میں امریکی فوجی موجودگی مزید کم ہو سکتی ہے اور واشنگٹن مستقبل میں یورپ سے دفاعی ذمہ داریوں میں اضافہ کا مطالبہ کر سکتا ہے۔
جون میں امریکا نے یورپ میں اپنی فوجی تعیناتی کے چھ ماہ کے جائزے کا اعلان کیا تھا تاکہ یورپی ممالک براعظم کے دفاع کی زیادہ تر ذمہ داری خود سنبھالیں۔ فی الوقت یورپ میں 80 ہزار امریکی فوجی موجود ہیں جبکہ امریکا پہلے ہی بعض فوجیوں کی واپسی اور نیٹو کے دفاعی منصوبوں کے لیے مختص اپنی افواج میں کمی کا اعلان کر چکا ہے۔
یورپی حکام چاہتے ہیں کہ امریکا کو یہ پیغام پہنچایا جائے کہ نیٹو کے کئی اتحادی یورپ کے دفاع میں زیادہ کردار ادا کرنے کے لیے تیار ہیں تاہم بعض سفارتکاروں کو خدشہ ہے کہ امریکی جائزہ یورپی ممالک کے درمیان واشنگٹن کی حمایت حاصل کرنے کی دوڑ میں تبدیل ہو سکتا ہے۔
