کویت سٹی (شِنہوا) کویت میں قائم چینی ثقافتی مرکز میں 150 سے زائد چینی و کویتی چائے کے فن اور لذیذ پکوان چکھنے کی تقریب میں جمع ہوئے، جہاں انہوں نے مختلف اقسام کی چائے اور مٹھائیوں سے لطف اٹھایا اور دونوں ممالک میں چائے بنانے کی روایات کے بارے میں معلومات حاصل کیں۔
چینی ثقافتی مرکز کویت اور کویت کی قومی کونسل برائے ثقافت، فنون لطیفہ اور ادبیات (این سی سی اے ایل) کے اشتراک سے منعقد ہونے والی یہ تقریب کویت کے 18 ویں موسم سرما ثقافتی میلے کا حصہ تھی۔ اس کا مقصد چین اور کویت کی چائے کی روایات متعارف کرانا اور دونوں ممالک کے درمیان ثقافتی و عوامی روابط کو فروغ دینا تھا۔
شرکاء نے چین کی سبز، کالی، سفید اور اولونگ چائے کے ساتھ چینی مٹھائیوں کا ذائقہ چکھا۔ ایک الگ حصے میں کویتی اور عرب مشروبات کے ساتھ مقامی اور عرب مٹھائیاں بھی پیش کی گئیں۔ ان مشروبات میں کڑک چائے، لومی چائے اور مراکشی پودینے کی چائے شامل تھیں۔
کویت میں چین کے سفیر یانگ شن نے تقریب سے خطاب کرتے ہوئے کہا کہ رواں سال دونوں ممالک کے درمیان سفارتی تعلقات کے قیام کی 55 ویں سالگرہ منائی جا رہی ہے اور ثقافتی تبادلے دونوں عوام کے دلوں کو جوڑنے والا پل ہیں۔
تقریب کے اختتام پر شِنہوا سے گفتگو کرتے ہوئے یانگ شن نے کہا کہ یہ تقریب چین کی قدیم اور دیرینہ ثقافت کی ایک جھلک اور چین، کویت اور عرب دنیا کے درمیان ثقافتی تبادلے اور دوستی کے فروغ کا ذریعہ ہے۔
این سی سی اے ایل کے سیکرٹری جنرل محمد الجسار نے کہا کہ چینی چائے کے ساتھ کویتی اور عرب چائے کی روایات پیش کرنا مختلف ثقافتوں کے باہمی روابط اور روزمرہ کے مشترکہ رسم و رواج کی عکاسی کرتا ہے۔
الجسار نے کہا کہ چینی چائے کی تقریب چین کی حقیقی ثقافت کے ایک پہلو سے روشناس کرانے کے ساتھ ساتھ نسل در نسل منتقل ہونے والی رسومات اور اقدار کو بھی اجاگر کرتی ہے۔
کویت میں چینی ثقافتی مرکز کے ڈائریکٹر لیو جن ہونگ نے کہا کہ مرکز کو یہ دیکھ کر خوشی ہوئی کہ چائے نے چین اور کویت کی چائے کی بھرپور ثقافتوں کو متعارف کرانے کے لئے ایک پل کا کردار ادا کیا۔ انہوں نے کہا کہ چائے پیش کرکے مہمانوں کا استقبال کرنے کی روایت دونوں ثقافتوں میں مشترکہ قدر کی حیثیت رکھتی ہے۔
کویتی چائے کی ثقافت کی ماہر سارہ ماہر الماجد نے عرب چائے کی ثقافت پر ایک پریزنٹیشن دی۔ انہوں نے اپنی گفتگو کا آغاز ان تجارتی اور ثقافتی راستوں کے جائزے سے کیا جن کے ذریعے چائے چین سے عرب دنیا تک پہنچی۔
چینی چائے کی ثقافت کے کویتی شوقین ناصر السقر نے چین میں چائے بنانے کے فن کا مطالعہ کرنے کے اپنے تجربات بیان کئے۔ انہوں نے تازہ پتیوں کی چنائی سے لے کر ان کی پروسیسنگ اور تیاری تک چینی چائے کی پیداوار کے مراحل کی وضاحت کی۔
تقریب میں ایک سیاحتی سٹال بھی لگایا گیا، جہاں چین میں چائے کی ثقافت سے متعلق سیاحتی راستوں اور معلوماتی وسائل کو اجاگر کیا گیا۔ یہ تقریب ” چائے کے ذریعے ہم آہنگی ” پروگرام کا حصہ تھی، جسے کویت میں چینی ثقافتی مرکز نے 2026 کے دوران منعقد کیا۔
