واشنگٹن (لارڈ میڈیا) امریکی صدر ڈونلڈ ٹرمپ نے ایران کے ساتھ تجارت کرنے والے ممالک، کمپنیوں اور مالیاتی اداروں کو سخت اقتصادی نتائج کی دھمکی دی ہے، جس کے باعث عالمی منڈی میں تیل کی قیمتوں میں اضافہ ہوا ہے۔
ٹرمپ نے کہا ہے کہ جو بھی ملک ایران کو معاشی سہارا فراہم کرے گا، اسے بھی کارروائی کا سامنا کرنا پڑ سکتا ہے۔ اس بیان کے فوراً بعد عالمی منڈی میں تیل کی قیمتوں میں اضافہ دیکھا گیا۔
رائٹرز کے مطابق برینٹ اور امریکی خام تیل دونوں کی قیمتیں مسلسل چھٹے روز بڑھی ہیں، جبکہ برینٹ میں ہفتہ وار بنیاد پر 6 فیصد سے زیادہ اور امریکی خام تیل میں 5 فیصد سے زیادہ اضافہ ہوا ہے۔
نئی امریکی پابندیوں کی وجہ سے ایران کی تیل برآمدات مزید محدود ہونے کے خدشے نے عالمی سپلائی پر دباؤ بڑھا دیا ہے۔ ایران پہلے ہی امریکی بحری ناکہ بندی اور آبنائے ہرمز میں رکاوٹوں کا سامنا کر رہا ہے۔
ایران کے اہم تجارتی شراکت داروں میں چین سب سے نمایاں ہے، جس نے 2025 میں ایران سے تقریباً 13 لاکھ 80 ہزار بیرل یومیہ تیل درآمد کیا تھا۔ نئی امریکی پابندیاں بیجنگ کے لیے خاص اہمیت رکھتی ہیں۔
ترکی، عراق، عمان، پاکستان اور بھارت بھی ایران کے اہم تجارتی شراکت داروں میں شامل ہیں۔ امریکی حکام کا کہنا ہے کہ نئی پابندیوں کی تفصیلات پیر کو سامنے لائی جائیں گی۔ امریکی وزیر خزانہ اسکاٹ بیسنٹ نے انہیں ایران کے خلاف تاریخ کی سخت ترین مالی پابندیوں میں شمار کیا ہے۔
