دمشق (لارڈ میڈیا) اسرائیلی فضائی حملوں سے شام کے شمال مغربی صوبہ ادلب میں واقع ابو ظہور ایئربیس کو نقصان پہنچا ہے، تاہم کوئی جانی نقصان نہیں ہوا۔ شامی سرکاری ٹی وی کے مطابق اسرائیل نے ایئربیس کے رن وے کو 8 میزائل حملوں سے نشانہ بنایا۔ شام کے وزیر خارجہ اسعد الشیبانی نے ان حملوں کی مذمت کرتے ہوئے انہیں شام کی خودمختاری کی خلاف ورزی اور خطے کے استحکام کے لیے خطرہ قرار دیا ہے۔
ترکیہ اور قطر سمیت کئی ممالک نے بھی ان اسرائیلی حملوں کی مذمت کی ہے۔ امریکی سفیر برائے ترکی و خصوصی نمائندہ برائے شام ٹام بارک نے کہا ہے کہ امریکا اس حملے پر گہری تشویش میں مبتلا ہے اور یہ اقدام خطے میں کشیدگی کم کرنے میں مدد نہیں دے گا۔
اسرائیلی فوج نے حملے پر فوری طور پر کوئی تبصرہ نہیں کیا، تاہم اسرائیل ان حملوں کو کرد علیحدگی پسندوں کے خاتمے کی کوشش قرار دیتا رہا ہے۔
یاد رہے کہ دسمبر 2024 میں بشار الاسد حکومت کے خاتمے کے بعد اسرائیل شام میں سیکڑوں فضائی حملے کرچکا ہے، جن میں زیادہ تر سابق شامی فوج کے عسکری اثاثوں کو نشانہ بنایا گیا۔
