تہران (لارڈ میڈیا) : ایرانی پاسدارانِ انقلاب نے اعلان کیا ہے کہ ایران کے جنوب مشرقی علاقے میں امریکا اور اسرائیل سے منسلک ایک مبینہ دہشتگرد گروپ کے چھ ارکان کو گرفتار کر لیا گیا ہے۔ حکام کے مطابق یہ افراد تخریبی کارروائیوں کے لیے علاقے میں داخل ہوئے تھے جنہیں سکیورٹی فورسز نے کارروائی کرتے ہوئے گرفتار کر لیا۔
پاسدارانِ انقلاب کے مطابق گرفتار افراد کے امریکا اور اسرائیل سے روابط تھے اور یہ ملک میں تخریبی سرگرمیوں کے لیے کام کر رہے تھے۔ تاہم حکام نے گرفتار افراد کے خلاف الزامات کی مزید تفصیلات یا ان کے مبینہ روابط کے شواہد فوری طور پر ظاہر نہیں کیے۔
ایرانی حکام نے کہا ہے کہ اس واقعے سے متعلق مزید تحقیقات جاری ہیں تاکہ مزید شواہد اکٹھے کیے جا سکیں اور اس گروپ کی مکمل کارروائیوں کا پردہ فاش ہو سکے۔
