پولینڈ کے معروف ماہرِ فلکیات الیگزینڈر وولشچان نے کہا ہے کہ چین کی بڑھتی ہوئی ریڈیو فلکیاتی صلاحیتیں سائنسدانوں کو فلکیات کے بعض بڑے حل طلب سوالات کے جوابات تلاش کرنے میں مدد دے سکتی ہیں۔
ساؤنڈ بائٹ 1 (انگریزی): الیگزینڈر وولشچان، پولش ماہرِ فلکیات
’’آپ جانتے ہیں کہ آپ کے پاس نہایت اچھی کارکردگی دکھانے کی بہت زیادہ صلاحیت موجود ہے۔ اور آپ پہلے ہی بہت اچھا کام کر رہے ہیں۔ اب آپ کے پاس دنیا کی سب سے بڑی سنگل ڈش ریڈیو دوربین موجود ہے۔ اس کا مطلب ہے کہ آپ اس کے ذریعے بہت سے دلچسپ سائنسی کام انجام دے سکتے ہیں۔ اور ہو سکتا ہے کہ مستقبل میں آپ کی جانب سے اس سے بھی زیادہ جدید اور دلچسپ آلات تیار کئے جائیں۔‘‘
تین دہائیوں سے زائد عرصہ قبل وولشچان کے مشاہدات کے نتیجے میں نظامِ شمسی سے باہر موجود سیاروں کی پہلی مصدقہ دریافت ہوئی تھی۔
انہوں نے اریسیبو ریڈیو دوربین کے ذریعے تحقیق میں کئی برس لگائے۔ ایک وقت تک اریسیبو ریڈیو دوربین کو پلسارز (دھڑکتے نیوٹران ستاروں)کے مطالعے کے لئے دنیا کے بہترین آلات میں شمار کیا جاتا تھا۔
جب اریسیبو ریڈیو دوربین نے کام کرنا بند کیا تو چین کی پانچ سو میٹر اپرچر اسفیریکل ریڈیو ٹیلی اسکوپ (فاسٹ)نے اس کے بہت سے تحقیقی کام سنبھال لئے۔
ساؤنڈ بائٹ 2 (انگریزی): الیگزینڈر وولشچان، پولش ماہرِ فلکیات
’’میں ماضی میں اریسیبو ریڈیو دوربین استعمال کرتا تھا۔ یقیناً اب یہ موجود نہیں ہے۔ لیکن اس کے بجائے فاسٹ موجود ہے جو اس سے بھی بڑی ہے اور آسمان کے زیادہ وسیع حصے کا مشاہدہ کر سکتی ہے۔
دیگر بڑی سنگل ڈش دوربینیں اس کے مقابلے میں بہت چھوٹی ہیں۔ فاسٹ ان سے پانچ گنا بڑی ہے جس کی وجہ سے اس کی حساسیت بھی 25 گنا زیادہ ہے۔
پلسارز کے شعبے میں فاسٹ پہلے ہی پلسارز کی خصوصیات کا جائزہ لینے میں ایک حقیقی فیصلہ کن کردار ادا کر رہی ہے۔
میرے خیال میں اس سے بھی زیادہ دلچسپ کام یہ ہے کہ شمسی نظام سے باہر موجود سیاروں کے مقناطیسی میدان تلاش کئے جائیں یا انہیں دریافت کرنے کی کوشش کی جائے۔
اور میں یقینی طور پر ایسا کرنے کی کوشش کروں گا کیونکہ یہ دوربین بہت بڑی ہے اور اس کی صلاحیت سے بھرپور فائدہ اٹھایا جا سکتا ہے۔اس کام کے لئے بہت زیادہ حساسیت درکار ہوتی ہے۔‘‘
کراکوف، پولینڈ سے شِنہوا نیوز ایجنسی کے نمائندوں کی رپورٹ
