بیجنگ (شِنہوا) چین کی وزارت تجارت نے امریکہ پر زور دیا کہ وہ ڈرونز اور ان کے پرزوں پر سیکشن 232 کے تحت عائد ٹیرف کی پالیسی فوری طور پر منسوخ کرے۔ وزارت نے کہا کہ ان اقدامات سے چینی کاروباری اداروں کے مفادات کو شدید نقصان پہنچ رہا ہے اور ڈرون کے عالمی صنعتی و سپلائی نظام میں تعاون متاثر ہو رہا ہے۔
وزارت تجارت کے ترجمان حہ یادونگ نے معمول کی پریس کانفرنس میں امریکہ کی جانب سے محصولات عائد کرنے کے فیصلے سے متعلق ایک سوال کے جواب میں کہا کہ چین کا موقف مسلسل یہ رہا ہے کہ امریکہ کے سیکشن 232 کے اقدامات ’’قومی سلامتی‘‘ کے بہانے یکطرفہ پسندی اور تحفظ پسندی پر مبنی ہیں۔
حہ نے کہا کہ درحقیقت امریکہ کو برآمد کئے جانے والے چینی ڈرونز بنیادی طور پر شہری مقاصد کے لئے استعمال ہوتے ہیں، جن میں زراعت، آلات کا معائنہ اور فلم و ٹیلی ویژن کی تفریحی سرگرمیاں شامل ہیں۔
انہوں نے کہا کہ امریکہ کے سیکشن 232 کے اقدامات قومی سلامتی کے تصور کو حد سے زیادہ وسعت دیتے ہیں، تجارتی شراکت داروں کے لئے مختلف شرح سے محصولات عائد کرتے ہیں اور متعلقہ چینی مصنوعات کے ساتھ امتیازی سلوک کرتے ہیں۔
ترجمان نے کہا کہ یہ اقدامات منصفانہ مقابلے پر مبنی مارکیٹ کے ماحول کے لئے مزید نقصان دہ ہیں۔ "چین اس کی پرزور مخالفت کرتا ہے۔”
