اسلام آباد (لارڈ میڈیا): میٹا اور پاکستان نے چھوٹے کاروباری اداروں کی ڈیجیٹل ترقی کے لیے مشترکہ اے آئی تربیتی پروگرام کا آغاز کر دیا ہے۔ اس پروگرام کا مقصد پاکستان میں مصنوعی ذہانت اور ڈیجیٹل ٹیکنالوجی کے فروغ سے کاروباری ترقی اور روزگار کے نئے مواقع پیدا کرنا ہے۔
اس پروگرام کے تحت اسمال بزنس گروتھ اکیڈمی کے ذریعے 9 شہروں میں ایک ہزار سے زائد کاروباری افراد کو اے آئی اور ڈیجیٹل ٹیکنالوجی کی تربیت دی جائے گی۔ خصوصی توجہ خواتین کی قیادت میں چلنے والے کاروباروں، ٹیکسٹائل، دستکاری اور آئی ٹی سروسز پر دی جائے گی۔
کاروباری افراد کو آن لائن صارفین تک رسائی، بہتر مارکیٹنگ اور کسٹمر سروسز کے لیے اے آئی ٹولز سکھائے جائیں گے۔ اس کے علاوہ ورکشاپس اور آن لائن ٹریننگ سیشنز بھی منعقد کیے جائیں گے۔
یہ اقدام میٹا کے ایشیا پیسیفک خطے کے 12 ممالک پر مشتمل وسیع تر اسمال بزنس ٹریننگ پروگرام کا حصہ ہے۔
ڈیجیٹل مہارتوں کے فروغ سے پاکستانی کاروباری اداروں کو ملکی و عالمی منڈیوں تک رسائی میں مدد ملے گی، جو جدید معیشت سے جوڑنے کی جانب اہم قدم ہے۔
