ہم بھی ایران سے ہرجانے کا مطالبہ کر رہے ہیں، ٹرمپ

واشنگٹن (شِنہوا) امریکی صدر ڈونلڈ ٹرمپ نے پیر کے روز کہا ہے کہ وہ بھی ایران سے ہرجانے کا مطالبہ کر رہے ہیں اور انہوں نے اپنے نمائندوں کو ہدایت کی ہے کہ آئندہ ہونے والے مذاکرات میں اس مطالبے کو شامل کیا جائے۔

ٹرمپ نے سوشل میڈیا پلیٹ فارم ٹروتھ سوشل پر ایک پوسٹ میں لکھا کہ انہوں نے دیکھا ہے کہ اسلامی جمہوریہ ایران کے نمائندے گزشتہ پانچ ماہ کے فوجی تنازع کے دوران ایران کو پہنچنے والے نقصان کا ہرجانہ مانگ رہے ہیں، لیکن مذاکرات یا ملاقاتوں میں اس کا کبھی ذکر نہیں کیا گیا۔

ٹرمپ نے اسے ایک دلچسپ خیال قرار دیتے ہوئے کہا کہ وہ بھی ایران سے ان تمام لوگوں کے قتل اور شدید زخمی ہونے پر ہرجانہ مانگ رہے ہیں جو ایران کے سڑک کنارے بموں اور متعدد تنازعات کا نشانہ بنے۔

کچھ دیر بعد ایک اور پوسٹ میں ٹرمپ نے کہا کہ ایران کو لبنان، شام، یمن اور غزہ کے لوگوں کو پہنچنے والے جانی اور مالی نقصان کا ذمہ دار ہونا چاہیے۔

ایرانی میڈیا نے ہفتے کے روز رپورٹ کیا کہ ایران کی اعلیٰ قومی سلامتی کونسل کے سیکرٹری محمد باقر ذوالقدر نے کہا ہے کہ آبنائے ہرمز اس وقت تک دوبارہ نہیں کھولا جائے گا جب تک امریکہ اپنا رویہ درست نہیں کرتا۔

ذوالقدر نے کہا کہ آبنائے ہرمز کھولنے کے لئے امریکہ کو کئی شرائط پوری کرنا ہوں گی۔ ان میں ایران اور خطے میں اس کے اتحادی مسلح گروہوں کے خلاف جنگ مستقل طور پر ختم کرنا، ایران کو دھمکیاں دینا بند کرنا، ایرانی بندرگاہوں کی بحری ناکہ بندی ختم کرنا، جنگ سے ہونے والے نقصانات کا ایران کو ہرجانہ دینا اور پابندیاں ختم کرنے کے ساتھ منجمد یا ضبط کئے گئے اثاثے غیرمشروط واپس کرنا شامل ہے۔