واشنگٹن (شِنہوا) ایک نئے سروے کے مطابق ہر تین میں سے ایک امریکی ایران کے خلاف جنگ کی حمایت کرتا ہے، جو پانچ ماہ سے جاری اس تنازع کے ابتدائی دنوں کے بعد اب تک کی کم ترین سطح ہے۔
رائٹرز اور اپسوس کے جمعہ سے اتوار تک کئے گئے اس سروے میں معلوم ہوا کہ 69 فیصد امریکی، جن میں ہر 10 میں سے 4 ریپبلکن بھی شامل ہیں، سمجھتے ہیں کہ امریکی صدر ڈونلڈ ٹرمپ نے "ایران میں امریکی فوجی مداخلت کے مقاصد واضح طور پر بیان نہیں کئے۔”
امریکہ اور اسرائیل کی جانب سے 28 فروری کو مشترکہ حملے شروع کئے جانے کے بعد سے اس جنگ کی عوامی حمایت مسلسل 40 فیصد سے کم رہی ہے۔
حالیہ متعدد سرویز سے ظاہر ہوتا ہے کہ جنگ کے خلاف عوامی ردعمل میں اضافہ ہو رہا ہے۔ حال ہی میں دی واشنگٹن پوسٹ اور اپسوس کے جاری کردہ ایک سروے میں 68 فیصد امریکیوں نے رائے دی کہ یہ جنگ "لڑنے کے قابل نہیں۔”
صدر ٹرمپ نے پیر کے روز کہا کہ انہوں نے ایران پر امریکی حملے عارضی طور پر روکنے کا فیصلہ کیا ہے تاکہ مذاکرات کو ایک اور موقع دیا جا سکے، تاہم انہوں نے خبردار کیا کہ اگر ایران کے ساتھ بات چیت ناکام ہوئی تو وہ دوبارہ حملوں کا حکم دے سکتے ہیں۔
گزشتہ ہفتے امریکی وزیر دفاع پیٹ ہیگستھ نے سینیٹ کی ایک سماعت کے دوران جنگ کے لئے مزید فنڈز کی درخواست کرتے ہوئے کہا کہ اب تک اس جنگ پر 37.5 ارب امریکی ڈالر خرچ ہو چکے ہیں، جبکہ مئی میں اس لاگت کا تخمینہ 29 ارب امریکی ڈالر بتایا گیا تھا۔
