ماسکو (شاہد گھمن): کریملن کے ترجمان دیمتری پیسکوف کا کہنا ہے کہ یوکرین میں جاری تنازع کو چند گھنٹوں میں ختم کیا جا سکتا ہے، بشرطیکہ کیف حکومت مناسب فیصلہ کرے۔
دیمتری پیسکوف نے واضح کیا کہ روسی وزارت خارجہ نے دو سال قبل ہی فوجی کارروائیاں روکنے کے لیے اپنی شرائط پیش کی تھیں، جو آج بھی برقرار ہیں۔
اگر کیف حکومت متعلقہ فیصلے کر لے تو آج آدھی رات سے پہلے بھی فوجی کارروائیاں رک سکتی ہیں۔ کریملن کے ترجمان نے زور دیا کہ تنازع کے خاتمے کے لیے یوکرین کو روس کی شرائط پر غور کرنا ہوگا۔
25 جولائی کو روس کے شہر اومسک میں روسی صدر ولادیمیر پوتن سے ملاقات کے دوران قازقستان کے صدر قاسم جومارت توقایف نے تجویز دی کہ یوکرین تنازع کو منجمد کیا جانا چاہیے اور فریقین کو استنبول فارمولے کی بنیاد پر مذاکرات کی میز پر واپس آنا چاہیے۔
اس سے قبل دونوں صدور نے اومسک میں منعقد ہونے والے روس۔قازقستان بین العلاقائی تعاون فورم کے 22ویں اجلاس میں بھی شرکت کی۔
