واشنگٹن (لارڈ میڈیا) امریکا نے ایرانی حملوں میں روس کے ممکنہ کردار کی تحقیقات شروع کر دی ہیں۔ امریکی خفیہ ایجنسی سی آئی اے کے خلیجی خطے میں مراکز پر ایرانی ڈرون حملوں کے بعد امریکی انٹیلی جنس ادارے یہ جاننے کی کوشش کر رہے ہیں کہ آیا روس نے ایرانی اہداف کی نشاندہی یا ڈرون ٹیکنالوجی فراہم کی تھی۔
امریکی انٹیلی جنس کے چار ذرائع نے بتایا کہ اب تک روس کے کردار کے بارے میں کوئی حتمی نتیجہ نہیں نکالا گیا۔ تاہم، حملوں کی مؤثریت اور ایران کے لیے روس کی تکنیکی معاونت کو تحقیقات کا مرکزی نکتہ قرار دیا جا رہا ہے۔
مارچ میں کم از کم دو سی آئی اے مراکز پر حملے ہوئے تھے، جن میں ایک سعودی عرب میں امریکی سفارت خانے کے اندر قائم سی آئی اے اسٹیشن اور دوسرا مشرقی عراق میں تھا۔ ذرائع کا کہنا ہے کہ مزید مراکز پر بھی حملے ہوئے ہیں، لیکن ان کی تفصیلات نہیں بتائی گئیں۔
رائٹرز اور امریکی میڈیا کے مطابق، ایرانی حملے روسی معلومات سے زیادہ مؤثر ہوئے ہیں اور روس ایران کو امریکی فوجی اثاثوں کی معلومات فراہم کرتا رہا ہے۔
