تہران (لارڈ میڈیا): سابق ایرانی صدر محمود احمدی نژاد نے امریکی اخبار نیویارک ٹائمز کی رپورٹ کو مسترد کرتے ہوئے کہا ہے کہ ان پر اسرائیلی موساد کے ساتھ رجیم چینج میں شمولیت کا الزام بے بنیاد ہے۔ احمدی نژاد نے اپنے گھر میں نظر بندی کے دعووں کو بھی مکمل طور پر بے بنیاد قرار دیا ہے۔
احمدی نژاد کے دفتر نے نیویارک ٹائمز پر الزام لگایا کہ وہ عوام کو گمراہ کرنے اور ایران میں داخلی تقسیم کو بڑھانے کے لیے من گھڑت رپورٹس شائع کر رہا ہے۔ دفتر نے اخبار کے الزامات کو مضحکہ خیز قرار دیتے ہوئے مکمل طور پر جھوٹا کہا ہے۔
نیویارک ٹائمز نے رپورٹ کیا تھا کہ حالیہ برسوں میں موساد نے احمدی نژاد کو اسرائیل کے ساتھ تعاون پر آمادہ کرنے کی کوشش کی تھی اور انہیں ایران کی قیادت کے لیے ممکنہ امیدوار کے طور پر پیش کیا تھا، تاہم احمدی نژاد نے ان دعووں کو بھی مسترد کر دیا ہے۔
