واشنگٹن (لارڈ میڈیا): امریکا نے ایران کے قریب اپنے دو طیارہ بردار بحری جہاز یو ایس ایس ابراہم لنکن اور یو ایس ایس جارج ایچ ڈبلیو بش تعینات کر دیے ہیں۔ امریکی بحریہ کی یہ تعیناتی خطے میں کشیدگی کے بڑھنے کے بعد کی گئی ہے۔
نیویارک پوسٹ کے مطابق اس تعیناتی کا مقصد آبنائے ہرمز کے اطراف سیکیورٹی کو مضبوط کرنا اور ایران پر ممکنہ دباؤ ڈالنا ہے۔ دونوں بحری جہاز خلیج عمان میں داخل ہو چکے ہیں۔
یہ اقدام تجارتی جہاز رانی پر ممکنہ حملوں کے خدشات کے پیش نظر اٹھایا گیا ہے۔ آبنائے ہرمز عالمی سطح پر تیل کی تقریباً 20 فیصد ترسیل کا اہم راستہ ہے۔
امریکا اور ایران کے درمیان کشیدگی اس وقت بڑھ گئی جب امریکی صدر ڈونلڈ ٹرمپ نے دونوں ممالک کے درمیان عارضی جنگ بندی کی منسوخی کا اعلان کیا، حالانکہ مذاکرات کا سلسلہ جاری رہ سکتا ہے۔
امریکا نے ایران پر تین آئل ٹینکروں پر حملوں کا الزام لگایا، جس کے بعد امریکی فوج نے ایرانی تنصیبات پر حملے کیے۔ ایران نے جواباً امریکی فوجی اڈوں کو نشانہ بنایا۔
امریکی سینٹرل کمانڈ نے مشرق وسطیٰ میں اپنی بحری قوت میں اضافہ کیا ہے تاکہ خطے کی سلامتی کو بہتر کیا جا سکے۔ سینٹ کام نے ایران کی بحری ناکہ بندی دوبارہ شروع کرنے کے حوالے سے تبصرہ کرنے سے گریز کیا۔
قطر کا ایک وفد تہران اور واشنگٹن کے درمیان کشیدگی کم کرنے کی کوششوں کے بعد ایران سے واپس روانہ ہو گیا ہے، جبکہ ایرانی حکام آبنائے ہرمز سے متعلق مذاکرات کے لیے عمان کا دورہ کریں گے۔
