بیجنگ (شِنہوا) چین نے ایک 5 سالہ منصوبہ جاری کیا ہے جس کا مقصد آئندہ 5 سال کے دوران معذور افراد کے لئے سماجی تحفظ، عوامی خدمات اور معیار زندگی کو مزید بہتر بنانا ہے۔
15ویں 5پانچ سالہ منصوبے (2026-2030) کے دوران معذور افراد کے تحفظ اور ترقی سے متعلق یہ منصوبہ ریاستی کونسل کی معذوری کے متعلق امور کی ورکنگ کمیٹی نے جاری کیا ہے۔ اس منصوبے میں مذکورہ مدت کے لئے اہم ترقیاتی اہداف، پالیسی اقدامات اور کلیدی خدماتی پروگراموں کا خاکہ پیش کیا گیا ہے۔
منصوبے کے مطابق چین 7 اہم شعبوں میں 32 بڑے اقدامات پر عمل کرے گا، جن میں 2030 تک معذور افراد کے لئے زیادہ پائیدار سماجی تحفظ اور نگہداشت کی خدمات کا نظام قائم کرنا، نیز ان کے لئے مزید جامع اور بہتر معیار کے روزگار کے مواقع پیدا کرنا شامل ہے۔
منصوبے میں اس عزم کا بھی اظہار کیا گیا ہے کہ بنیادی عوامی خدمات کو مزید موثر، درست اور آسان بنایا جائے گا، معذور افراد کی ثقافتی اور روحانی زندگی کو مزید فروغ دیا جائے گا، معاون ٹیکنالوجی کے ذریعے معذور افراد کی مدد کے نظام کو زیادہ موثر بنایا جائے گا اور ایک زیادہ جامع، مساوی اور رسائی کے قابل سماجی ماحول تشکیل دیا جائے گا۔
منصوبے کے مطابق آئندہ5سال کے دوران معذور افراد کے مجموعی معیار زندگی اور ترقی کی صلاحیت میں مزید بہتری آنے کی توقع ہے۔
چائنہ فیڈریشن آف پرسنز ود ڈس ایبلیٹیز کے مطابق 2025 کے اختتام تک تقریباً 2 کروڑ 77 لاکھ 40 ہزار معذور افراد بنیادی بڑھاپا پنشن انشورنس پروگرام میں شامل ہو چکے تھے، جبکہ ایک کروڑ 29 لاکھ 60 ہزار افراد پنشن کی سہولت سے مستفید ہو رہے تھے۔ رجسٹرڈ معذور افراد میں سے تقریباً 89 لاکھ افراد روزگار سے وابستہ تھے۔
