بیجنگ (شِنہوا) چین کی ریاستی انتظامیہ برائے مارکیٹ ریگولیشن اور وزارت تجارت نے ملک کے ای کامرس قانون میں مجوزہ ترمیم کے مسودے پر عوامی رائے طلب کرنا شروع کر دی۔
مجوزہ ترمیم میں 20 دفعات شامل ہیں جن میں قانون کے دائرہ کار کو مزید وسیع کرنے کی تجاویز بھی شامل ہیں۔ پلیٹ فارمز اور ان پر کام کرنے والے تاجروں کے علاوہ پلیٹ فارم معیشت کے دیگر شراکت داروں کے حقوق اور ذمہ داریوں کو بھی مزید واضح کرنے کی تجویز دی گئی ہے۔
مسودے میں پلیٹ فارمز کی ذمہ داریوں سے متعلق نظام کو بہتر بنانے پر زور دیا گیا ہے جس کے تحت نگرانی کے مختلف ذرائع کو وسعت دینے اور معمول کی ریگولیٹری نگرانی کو مزید موثر بنانے کی حمایت کی گئی ہے۔
پلیٹ فارم معیشت میں مختلف شعبوں پر محیط کاروباری سرگرمیوں کو مدنظر رکھتے ہوئے مجوزہ ترمیم میں ریگولیٹری اداروں کے درمیان بہتر ہم آہنگی پر زور دیا گیا ہے۔ اس ضمن میں آن لائن اور آف لائن کاروباروں پر یکساں نگرانی اور مختلف سرکاری اداروں کے درمیان تعاون کو مضبوط بنانے کی تجاویز شامل ہیں۔
ای کامرس کے شعبے میں سنگین غیر قانونی سرگرمیوں سے نمٹنے کے لئے عوامی خدشات کے پیش نظر ترمیم کے مسودے میں متعلقہ دفعات میں ترمیم کی تجویز دی گئی ہے۔
