نیویارک (لارڈ میڈیا): عالمی شہرت یافتہ گلوکارہ ٹیلر سوئفٹ اور امریکی فٹبال اسٹار ٹریوس کیلسی کی شادی کی تیاریاں آخری مراحل میں پہنچ چکی ہیں۔ دونوں نے 26 اگست 2025 کو اپنی منگنی کا اعلان کیا تھا اور اب شادی کی قیاس آرائیاں دوبارہ زور پکڑ گئی ہیں۔
حال ہی میں ٹیلر سوئفٹ نے ٹریوس کے زیرِ اہتمام ٹائٹ اینڈ یونیورسٹی (TEU) سمر کیمپ میں شرکت کی، جہاں ان کی موجودگی نے سب کو حیران کر دیا۔ ٹیلر کی خوش اخلاقی کی تعریف کرتے ہوئے جارج کٹل نے کہا کہ انہوں نے شادی کی تیاریوں کے باوجود تقریب میں شرکت کی۔
اگرچہ باضابطہ شادی کی تاریخ کا اعلان نہیں ہوا، مگر میئر ظہران ممدانی کی پریس کانفرنس میں غیر ارادی طور پر ٹیلر کی شادی کا ذکر آیا۔ انہوں نے 2026 فیفا ورلڈ کپ کی تیاریوں پر بات کرتے ہوئے کہا کہ شہر کو امریکا کی 250 ویں سالگرہ اور دیگر اہم ایونٹس کے ساتھ ‘ٹیلر سوئفٹ کی شادی’ کی میزبانی کرنی ہے۔
سوشل میڈیا پر میئر کے بیان کے بعد بحث شروع ہو گئی اور مختلف رپورٹس کے مطابق یہ جوڑا 3 جولائی 2026 کو میڈیسن اسکوائر گارڈن، نیویارک میں شادی کے بندھن میں بندھ سکتا ہے۔ مداح بے صبری سے اس ہائی پروفائل شادی کا انتظار کر رہے ہیں۔
