ممبئی (لارڈ میڈیا): بولی ووڈ اداکارہ تمنا بھاٹیا نے کہا ہے کہ وہ دولت کمانے کے عمل سے لطف اندوز ہو رہی ہیں، لیکن ان کا مقصد صرف پیسہ جمع کرنا نہیں بلکہ اپنی ایک الگ پہچان بنانا ہے۔ انہوں نے امریکی جریدے فوربز کو دیے گئے انٹرویو میں اپنی کامیابی اور کاروباری سفر پر روشنی ڈالی۔
تمنا بھاٹیا نے کہا کہ کوئی بھی دولت ساتھ لے کر نہیں جا سکتا، اس لیے وہ دولت کے بننے کے عمل سے لطف اندوز ہو رہی ہیں۔ ان کا کہنا تھا کہ وہ اپنے کام کو لوگوں تک پہنچانا چاہتی ہیں تاکہ زیادہ سے زیادہ خوشی ملے۔
انہوں نے مزید کہا کہ جب انسان کسی اچھے مقصد کے لیے کام کرتا ہے تو پیسہ خود بخود آ جاتا ہے۔ بھاٹیا کا ماننا ہے کہ دوسروں کی مدد کرنا کسی خاص دن کا کام نہیں بلکہ کاروبار کے ساتھ ہی چلتا رہتا ہے۔
بھارتی میڈیا رپورٹس کے مطابق، تمنا بھاٹیا لگ بھگ نوے فلموں میں کام کر چکی ہیں اور ان کی دولت ایک ارب بھارتی روپے سے زیادہ بتائی جاتی ہے۔ وہ ممبئی میں سمندر کے کنارے ایک قیمتی اپارٹمنٹ کی مالک ہیں۔
فلموں میں کامیابی کے بعد انہوں نے کاروبار کی دنیا میں قدم رکھا ہے اور حال ہی میں اپنا جیولری برانڈ ‘تمنا فائن جیولری’ شروع کیا ہے۔ ان کا کہنا ہے کہ ان کا مقصد صرف دولت جمع کرنا نہیں بلکہ اپنے کام کو بڑھانا ہے۔
