بیجنگ (شِنہوا) چین کی ریاستی کونسل نے 15ویں 5 سالہ منصوبے (2026-2030) کے دوران روزگار کو اولین ترجیح دینے کی حکمت عملی پر عملدرآمد کے لئے ایک منصوبہ جاری کیا ہے جس میں اعلیٰ معیار اور مکمل روزگار کے فروغ کے لئے اہداف، اہم ذمہ داریاں اور پالیسی اقدامات واضح کئے گئے ہیں۔
منصوبے میں 15ویں 5 سالہ منصوبے کی مدت کے لئے متعدد اہداف مقرر کئے گئے ہیں جن میں مجموعی طور پر روزگار کے استحکام کو برقرار رکھنا، روزگار کے مزید مناسب مواقع فراہم کرنا اور زیادہ منصفانہ روزگار کا ماحول پیدا کرنا شامل ہے۔ اس کے ساتھ ساتھ روزگار کے ڈھانچے کو مزید بہتر بنانے اور ملازمتوں اور امیدواروں کے درمیان موثر مطابقت پیدا کرنے پر بھی زور دیا گیا ہے۔
منصوبے میں 9 اہم شعبوں میں اقدامات کی نشاندہی کی گئی ہے۔ اس میں روزگار کے فروغ کے لئے معاشی پالیسیوں کے باہمی تعاون کو مضبوط بنانے پر زور دیا گیا ہے جبکہ محنت طلب صنعتوں میں روزگار کے استحکام، خدمات کے شعبے میں روزگار کے مواقع میں توسیع اور ابھرتے ہوئے شعبوں میں روزگار کی صلاحیتوں سے فائدہ اٹھانے کی ضرورت کو بھی اجاگر کیا گیا ہے۔
انسانی وسائل کی ترقی کے حوالے سے یہ منصوبہ افرادی قوت کو جدید تقاضوں کے مطابق ڈھالنے اور تعلیم کی فراہمی اور ہنر مند افرادی قوت کی طلب کے درمیان ہم آہنگی بہتر بنانے کی ضرورت پر زور دیتا ہے۔ اس مقصد کے لئے پیشہ ورانہ مہارتوں کی تربیت کو وسعت دینے کی تجویز دی گئی ہے تاکہ کارکنان کو مطلوبہ صلاحیتوں سے بہتر طور پر آراستہ کیا جا سکے۔
نوجوانوں، بالخصوص یونیورسٹی کے فارغ التحصیل طلبہ کے لئے یہ منصوبہ روزگار اور پیشہ ورانہ ترقی کے مزید مواقع اور راستے فراہم کرنے کا ہدف رکھتا ہے۔
