واشنگٹن (شِنہوا) امریکی صدر ڈونلڈ ٹرمپ نے کہا ہے کہ ایران کے ساتھ جاری مذاکرات کے نتائج "تقریباً 24 گھنٹوں میں” واضح ہو جائیں گے۔
نیویارک پوسٹ کے مطابق انہوں نے یہ بیان اس وقت دیا جب نائب صدر جے ڈی وینس پاکستان کے دارالحکومت اسلام آباد میں ایران کے ساتھ مذاکرات کے لئے واشنگٹن سے روانہ ہوئے۔
ٹرمپ نے کہا کہ "ہم تقریباً 24 گھنٹوں میں جان لیں گے، ہمیں جلد ہی معلوم ہو جائے گا۔” ساتھ ہی انہوں نے خبردار کیا کہ اگر پاکستان میں امن مذاکرات ناکام ہوئے تو امریکہ ایران کے خلاف حملے دوبارہ شروع کرنے کے لئے اپنے جنگی بحری جہازوں کو دوبارہ اسلحہ سے لیس کر رہا ہے۔
انہوں نے دھمکی دیتے ہوئے کہا کہ اگر معاہدہ نہ ہوا تو ہم ان کا استعمال کریں گے اور بہت موثر طریقے سے کریں گے۔
امریکہ، ایران اور اسرائیل تینوں ہی جنگ میں کامیابی کا دعویٰ کر چکے ہیں۔ ماہرین کے مطابق موجودہ جنگ بندی نازک ہے اور باہمی مفادات کے ٹکراؤ اور دیرینہ اختلافات کے باعث آئندہ مذاکرات میں مستقل امن معاہدہ طے پانا مشکل ہو سکتا ہے۔
نیویارک پوسٹ کے مطابق امریکی فریق مذاکرات میں ایران سے مطالبہ کرے گا کہ وہ گہرائی میں محفوظ تقریباً ایک ہزار پاؤنڈ افزودہ یورینیم حوالے کرے اور آبنائے ہرمز کو بین الاقوامی جہاز رانی کے لئے دوبارہ کھولے۔
