لندن (لارڈ میڈیا): برطانیہ کے دارالحکومت لندن نے 2029 ورلڈ ایتھلیٹکس چیمپئن شپ کی میزبانی کے لیے اپنی حتمی بولی جمع کر دی ہے۔ یہ بولی ایتھلیٹک وینچرز کی جانب سے پیش کی گئی جس میں یو کے ایتھلیٹکس، لندن میراتھن ایونٹس اور گریٹ رن کمپنی شامل ہیں۔
منصوبے کے مطابق لندن اسٹیڈیم کو مقابلوں کے لیے مرکزی مقام بنایا جائے گا، جو 2012 اولمپکس کے لیے تعمیر کیا گیا تھا اور حالیہ برسوں میں لندن ڈائمنڈ لیگ کی میزبانی بھی کرتا رہا ہے۔
میزبان شہر کا باضابطہ اعلان ستمبر میں متوقع ہے۔ حکام کے مطابق اس ایونٹ سے برطانوی معیشت کو تقریباً 40 کروڑ پاؤنڈ کا معاشی اور سماجی فائدہ پہنچنے کی توقع ہے۔
برطانوی حکومت پہلے ہی اس بولی کی حمایت کا اعلان کر چکی ہے جبکہ ویسٹ ہیم یونائیٹڈ نے بھی لندن اسٹیڈیم کے استعمال کے لیے مکمل تعاون کی یقین دہانی کرائی ہے۔
واضح رہے کہ لندن 2017 میں بھی ورلڈ ایتھلیٹکس چیمپئن شپ کی کامیاب میزبانی کر چکا ہے۔ منتظمین کا کہنا ہے کہ اگر اس بار بھی بولی کامیاب ہوئی تو یہ برطانیہ کی اولمپک وراثت کو مزید مضبوط بنانے کے ساتھ کھیلوں اور سیاحت کے فروغ میں بھی اہم کردار ادا کرے گی۔
