بیجنگ (شِنہوا) چین کی وزارت صنعت و انفارمیشن ٹیکنالوجی (ایم آئی آئی ٹی) نے منگل کے روز بتایا کہ چین نے خودکار ڈرائیونگ نظام کے حفاظتی تقاضوں سے متعلق ایک لازمی قومی معیار جاری کر دیا ہے۔
ریاستی انتظامیہ برائے مارکیٹ ریگولیشن اور قومی معیار بندی انتظامیہ کی منظوری سے جاری کیا گیا یہ معیار یکم جولائی 2027 سے نافذ العمل ہوگا۔
وزارت کے مطابق اس معیار کا اطلاق لیول 3 اور لیول 4 خودکار ڈرائیونگ نظام سے لیس ایم اور این زمرے کی گاڑیوں پر ہوگا، تاہم اس میں خودکار پارکنگ نظام شامل نہیں ہیں۔
وزارت کے مطابق اس معیار کے تحت گاڑیاں بنانے والی کمپنیوں کو مصنوعات کے پورے لائف سائیکل کے دوران حفاظتی یقین دہانی کے نظام کو بہتر بنانا ہوگا، جبکہ خودکار ڈرائیونگ نظام کی تیاری اور توثیق کے مرحلے میں سیمولیشن، فیلڈ ٹیسٹ اور سڑکوں پر آزمائش بھی کرنا ہوگی۔
اس معیار میں متحرک ڈرائیونگ کے فرائض انجام دینے کی صلاحیت بہتر بنانے پر بھی زور دیا گیا ہے، جبکہ انسان اور مشین کے باہمی تعامل اور صارف کو بروقت آگاہ کرنے سے متعلق تقاضے بھی مقرر کئے گئے ہیں تاکہ نظام کے غلط یا ناجائز استعمال کو روکا جا سکے۔
لیول 3 خودکار ڈرائیونگ نظام کے لئے گاڑیوں میں یہ صلاحیت ہونا ضروری ہوگا کہ وہ اس بات کی نگرانی کر سکیں کہ ڈرائیور ضرورت پڑنے پر گاڑی کا کنٹرول سنبھالنے کے لئے تیار ہے یا نہیں۔
وزارت نے کہا کہ آئندہ مرحلے میں ذہین منسلک گاڑیوں کی مصنوعات کے لئے مارکیٹ تک رسائی کے انتظام کو مزید مضبوط بنایا جائے گا، خودکار ڈرائیونگ نظام کی آزمائش کے طریقہ کار کو بہتر بنایا جائے گا اور ذہین منسلک گاڑیوں کے لئے موثر ضابطہ جاتی نظام تشکیل دیا جائے گا تاکہ اس شعبے کی اعلیٰ معیار کی ترقی کو یقینی بنایا جا سکے۔
