نیویارک (لارڈ میڈیا) عالمی ٹیکسٹائل نمائش ‘ٹیکس ورلڈ این وائی سی 2026’ نیویارک کے جیکب کے جاوِٹس کنونشن سینٹر میں شروع ہوگئی۔ پاکستان نے اس نمائش میں اپنے قومی پویلین کے ذریعے ٹیکسٹائل، ملبوسات، ہوم ٹیکسٹائل، لیدر مصنوعات اور اسپورٹس ویئر سمیت اعلیٰ معیار کی ویلیو ایڈڈ مصنوعات پیش کی ہیں۔
پاکستان پویلین کا افتتاح امریکا میں پاکستان کے سفیر رضوان سعید شیخ نے کیا۔ نیویارک میں پاکستان کے قونصل جنرل عامر احمد اتوزئی اور ٹریڈ اینڈ انویسٹمنٹ کونسلر عدنان محمود اعوان بھی اس موقع پر موجود تھے۔
پاکستان پویلین کا اہتمام ٹریڈ ڈیولپمنٹ اتھارٹی آف پاکستان (TDAP) اور قونصل خانہ پاکستان نیویارک کے ٹریڈ اینڈ انویسٹمنٹ ونگ کے اشتراک سے کیا گیا ہے۔ اس میں 5 ممتاز پاکستانی کمپنیاں اپنی مصنوعات کی نمائش کر رہی ہیں۔
افتتاح کے بعد سفیرِ پاکستان نے پاکستانی کمپنیوں کے نمائندوں سے ملاقات کی اور ان کی مصنوعات کا جائزہ لیا۔ اس موقع پر امریکی منڈی میں کاروباری مواقع اور تجارتی تعاون پر تبادلۂ خیال بھی کیا گیا۔
سفیرِ پاکستان رضوان سعید شیخ نے کہا کہ حکومتِ پاکستان اور نیویارک میں قونصل خانہ پاکستانی برآمد کنندگان کو امریکی منڈی میں اپنی رسائی بڑھانے کے لیے معاونت فراہم کرتے رہیں گے۔
انہوں نے مزید کہا کہ پاکستان اور امریکا کے درمیان تجارتی روابط کو مزید وسعت دینے اور ‘میڈ اِن پاکستان’ برانڈ کو عالمی منڈیوں میں نمایاں مقام دلانے کے لیے کوششیں جاری رکھی جائیں گی۔
ٹیکس ورلڈ این وائی سی بین الاقوامی ٹیکسٹائل نمائشوں میں شمار ہوتی ہے جس میں دنیا بھر سے خریدار اور صنعت کے نمائندے شرکت کرتے ہیں۔ پاکستان کی شرکت ملکی ٹیکسٹائل صنعت کی پیداواری صلاحیت اور برآمدی استعداد کو عالمی سطح پر اجاگر کرنے کا موقع فراہم کر رہی ہے۔
نمائش کے دوران پاکستانی کمپنیاں بزنس ٹو بزنس ملاقاتیں بھی کریں گی جن سے تجارتی شراکت داریوں اور ممکنہ برآمدی معاہدوں کی توقع ہے۔
