چولپون-آتا، کرغزستان(شِنہوا)چین کے وزیر خارجہ وانگ یی نے کرغزستان کے اپنے ہم منصب جین بیک کولوبائیف کے ساتھ مذاکرات کیے ہیں۔
کمیونسٹ پارٹی آف چائنہ کی مرکزی کمیٹی کے سیاسی بیورو کے رکن وانگ یی نے کرغزستان کو شنگھائی تعاون تنظیم (ایس سی او) کے رکن ممالک کے وزرائے خارجہ کی کونسل کے اجلاس کی کامیاب میزبانی پر مبارکباد دی۔ انہوں نے کہا کہ اس اجلاس نے ایس سی او بشکیک سربراہی اجلاس کے لیے مضبوط بنیاد فراہم کی ہے۔
وانگ نے کہا کہ اچھا ہمسایہ سونے سے بھی زیادہ قیمتی ہوتا ہے، چین ہمیشہ کرغزستان کا ایک قابل اعتماد اچھا ہمسایہ رہے گا۔ انہوں نے کہا کہ حالیہ برسوں میں چینی صدر شی جن پھنگ اور کرغز صدر سیدر جباروف کی اسٹریٹجک رہنمائی کے تحت دونوں ممالک نے یکجہتی اور باہمی فائدے کے جذبے کے ساتھ نئے دور میں ایک جامع اسٹریٹجک شراکت داری قائم کی ہے، اور دونوں ممالک اچھے ہمسایہ تعلقات، دوستی اور مشترکہ خوشحالی پر مبنی چین-کرغزستان مشترکہ مستقبل کی حامل کمیونٹی کی تعمیر کے لیے مل کر کام کر رہے ہیں۔
وانگ نے نشاندہی کی کہ دونوں ممالک کے سربراہان مملکت گزشتہ سال3 مرتبہ ملاقات کر چکے ہیں، جس سے دوطرفہ تعلقات کی ترقی کے لیے سمت متعین ہوئی اور باہمی مفید تعاون کو مزید گہرا کرنے کے لیے مضبوط رفتار پیدا ہوئی۔ انہوں نے کہا کہ جباروف کی قیادت میں کرغزستان نے قومی ترقی میں نمایاں کامیابیاں حاصل کی ہیں اور چین کو ملک کی ترقی دیکھ کر دلی خوشی ہے۔
وانگ یی نے کہا کہ رواں سال کمیونسٹ پارٹی آف چائنہ کے قیام کی 105ویں سالگرہ اور چین کے 15ویں 5سالہ منصوبے کا پہلا سال ہے۔ انہوں نے کہا کہ چین چینی طرز کی جدیدیت کے ذریعے ایک مضبوط ملک کی تعمیر اور قومی احیا کے عظیم مقصد کو آگے بڑھا رہا ہے، جبکہ کرغزستان بھی 2030 تک کے اپنے قومی ترقیاتی پروگرام پر فعال طور پر عمل درآمد کر رہا ہے۔ انہوں نے مزید کہا کہ دونوں ممالک کو اپنی ترقیاتی حکمت عملیوں کو ہم آہنگ کرنے اور مشترکہ طور پر ترقی و بحالی کے لیے وسیع امکانات حاصل ہیں۔
اس موقع پر کولوبائیف نے کہا کہ کرغزستان اور چین مخلص شراکت دار ہیں اور ان کے تعلقات برابری، باہمی اعتماد، باہمی احترام اور قابل بھروسہ تعاون پر قائم ہیں۔ انہوں نے کہا کہ دونوں ممالک کے سربراہان نے باہمی اعتماد کی ایک بلند سطح قائم کی ہے جس کی رہنمائی میں دوطرفہ تعلقات تاریخ کے بہترین دور میں داخل ہو چکے ہیں۔
