بیجنگ (شِنہوا) چین کے نائب صدر ہان ژینگ نے کہا ہے کہ چین اور پاکستان کو پیچیدہ ہوتے بیرونی ماحول میں مضبوطی سے ایک دوسرے کے ساتھ کھڑا رہنا چاہیے۔
ہان ژینگ نے یہ بات بیجنگ میں چین اور پاکستان کے درمیان سفارتی تعلقات کے قیام کی 75 ویں سالگرہ کے موقع پر منعقدہ ایک استقبالیہ تقریب سے خطاب کرتے ہوئے کہی، جس میں پاکستان کے وزیراعظم شہباز شریف نے بھی شرکت کی۔
تقریب میں دونوں ممالک کے مختلف شعبہ ہائے زندگی سے تعلق رکھنے والے تقریباً 400 افراد نے شرکت کی۔
ہان ژینگ نے کہا کہ مشترکہ مستقبل اور گہری دوستی رکھنے والے قریبی ہمسایہ ممالک کے طور پر چین اور پاکستان نے سفارتی تعلقات کے قیام کے بعد گزشتہ 75 برسوں کے دوران باہمی احترام، اعتماد، حمایت اور تعاون کو برقرار رکھا ہے اور مختلف نظاموں اور ثقافتوں کے حامل ممالک کے درمیان دوستانہ تعلقات اور باہمی مفاد پر مبنی تعاون کی ایک مثال قائم کی ہے۔
انہوں نے کہا کہ چین پاکستان کے ساتھ مل کر دونوں رہنماؤں کے درمیان طے پانے والے اہم اتفاق رائے پر مخلصانہ عملدرآمد، سفارتی تعلقات کی 75 ویں سالگرہ کو روایتی دوستی کو آگے بڑھانے کے ایک موقع کے طور پر استعمال کرنے، تزویراتی رابطوں کو مضبوط بنانے، عملی تعاون کو گہرا کرنے اور نئے دور میں چین-پاکستان مشترکہ مستقبل کی حامل مزید قریبی برادری کی تعمیر کو تیز کرنے کے لئے تیار ہے۔
شہباز شریف نے کہا کہ پاکستان اور چین کی دوستی ناقابل شکست ہے اور یہ بے مثال بلندی تک پہنچ چکی ہے۔
انہوں نے مزید کہا کہ پاکستان چینی عوام کی عظیم ترقیاتی کامیابیوں کو قدر کی نگاہ سے دیکھتا ہے اور اپنی ترقی کو آگے بڑھانے کے لئے چین کے تجربات سے سیکھنے اور استفادہ کرنے کا خواہاں ہے تاکہ دونوں ممالک کے درمیان پائیدار دوستی کو نسل در نسل فروغ دیا جا سکے۔
