ہیلسنکی (شِنہوا) فن لینڈ کے صدر الیگزینڈر سٹب نے کہا ہے کہ اگر روس اور یوکرین کے معاملے پر امریکی پالیسیاں یورپی مفادات سے ہم آہنگ نہ رہیں تو یورپ کو روس کے ساتھ براہ راست رابطہ کرنا چاہیے۔
فن لینڈ کے ذرائع ابلاغ نے پیر کے روز اطالوی اخبار کوریئر ڈیلے سیرا کو دیئے گئے ایک انٹرویو کے حوالے سے خبر دی ہے کہ سٹب کے مطابق اب وقت آ گیا ہے کہ روس سے بات چیت شروع کی جائے تاہم انہوں نے یہ بھی کہا کہ ابھی یہ واضح نہیں کہ یہ مذاکرات کب شروع ہوں گے اور ان کی قیادت کون کرے گا۔
انہوں نے کہا کہ یورپی رہنما اس بات پر غور کر چکے ہیں کہ روس سے رابطہ کون قائم کرے گا لیکن ابھی تک کوئی فیصلہ نہیں کیا گیا۔
انہوں نے کہا کہ یہ کوئی خصوصی ایلچی ہوگا یا چند رہنماؤں کا گروپ یہ ہم بعد میں دیکھیں گے اور اس بات پر زور دیا کہ یورپی ممالک کے درمیان قریبی ہم آہنگی ضروری ہے۔
انہوں نے جلد امن معاہدے کی توقعات سے بھی خبردار کرتے ہوئے کہا کہ انہیں نہیں لگتا کہ رواں سال امن ممکن ہو سکے گا۔
فن لینڈ کے میڈیا کے مطابق یہ انٹرویو جمعہ کے روز ہیلسنکی میں صدارتی محل میں کیا گیا تھا اور پیر کو شائع ہوا۔
