اسلام آباد (لارڈ میڈیا): حکومت نے سردیوں میں بڑھتی ہوئی گیس کی طلب کو پورا کرنے کے لیے تقریباً 2 ارب ڈالر مالیت کی مائع قدرتی گیس (ایل این جی) درآمد کرنے کا فیصلہ مؤخر کر رکھا ہے۔ پیٹرولیم ڈویژن نے اکتوبر کے پہلے ہفتے میں درآمدی عمل شروع کرنے کی سفارش کی تھی تاکہ گیس کی بلا تعطل فراہمی یقینی بنائی جا سکے اور ممکنہ قلت کے باعث عوامی بے چینی سے بچا جا سکے۔
حکام کے مطابق کابینہ کمیٹی برائے توانائی نے پیٹرولیم ڈویژن کی جانب سے پیش کردہ 22 ایل این جی کارگوز درآمد کرنے کی سمری پر غور نہیں کیا، جس میں کچھ کارگوز امریکہ اور آذربائیجان سے حاصل کرنے کی تجویز بھی شامل تھی۔ پیٹرولیم وزیر علی پرویز ملک نے کہا کہ معاملہ سی سی او ای کے فیصلے کا منتظر ہے۔ وزیراعظم نے بھی گیس کی ضروریات اور درآمدی مقدار کا تعین کرنے کے لیے اجلاسوں کی صدارت کی ہے۔
قطر سے طویل مدتی معاہدے کے تحت 11 ایل این جی کارگوز ملنے کی توقع تھی، لیکن مشرق وسطیٰ کی غیر یقینی صورتحال کے باعث قطر نے نومبر تک فورس میجر کی مدت بڑھا دی ہے، جس سے طے شدہ گیس کی فراہمی متاثر ہونے کا خدشہ ہے۔ حکام کے مطابق، 22 کارگوز درآمد کرنے کی ضرورت پر اتفاق ہے، تاہم ایک رائے یہ بھی ہے کہ صرف 15 کارگوز درآمد کیے جائیں۔
ماہرین کے نزدیک اس صورت میں سردیوں کے عروج پر گیس کی قلت مزید شدت اختیار کر سکتی ہے۔ درآمدی گیس کی بھاری لاگت فیصلے میں تاخیر کی بڑی وجہ ہے، کیونکہ فی کارگو اوسطاً 8 کروڑ 70 لاکھ ڈالر لاگت آتی ہے۔ حکومت نے ابتدا میں ایل این جی درآمد کرنے کی لاگت تقریباً ڈیڑھ ارب ڈالر لگائی تھی، لیکن قطر سے فراہمی غیر یقینی ہونے کے باعث اب اسپاٹ مارکیٹ سے مہنگی گیس خریدنے کا امکان بڑھ گیا ہے۔
سرکاری زرمبادلہ کے مجموعی ذخائر 21 ارب ڈالر سے کچھ زیادہ ہیں، اور حکومت نے یورو بانڈز کے ذریعے 3 ارب ڈالر قرض بھی حاصل کیا ہے، جس کے بعد اسی مالیت کی بڑی قرض ادائیگی درپیش ہے۔ دیگر ذرائع سے مالی معاونت محدود ہونے کے باعث ایل این جی کی درآمد کے لیے وسائل کا انتظام اہم چیلنج بن گیا ہے۔ پیٹرولیم ڈویژن نے سفارش کی ہے کہ گھریلو صارفین کو صبح 5 بجے سے رات 10 بجے تک گیس کی مسلسل فراہمی ترجیحی بنیادوں پر یقینی بنائی جائے۔
