وینتیان (شِنہوا) چین اور لاؤس کی انسانی ہمدردی اور طبی امداد پر مبنی مشترکہ مشق "پیس ٹرین-2026” کا لاؤس کے دارالحکومت وینتیان میں آغاز ہو گیا۔
تقریب کا آغاز چین اور لاؤس کے قومی ترانوں سے ہوا۔ اس کے بعد لاؤ پیپلز آرمی کے محکمے جنرل لاجسٹکس کے ڈائریکٹر جنرل چانڈی سولی وونگ ساک اور چائنیز کمانڈ اینڈ کوآرڈینیشن گروپ کے سربراہ وو دان نے خطاب کیا اور مشترکہ مشق کے باضابطہ آغاز کا اعلان کیا۔
چانڈی نے اپنے خطاب میں کہا کہ لاؤس اور چین کی "پیس ٹرین” مشترکہ مشق اور طبی خدمات کی سرگرمیاں دونوں ممالک کی افواج کی مشترکہ امداد اور قدرتی آفات سے نمٹنے کی صلاحیتوں کو بہتر بنانے کے لئے ایک اہم پلیٹ فارم ہیں۔ یہ سرگرمیاں دونوں ممالک اور افواج کے درمیان قریبی اور دوستانہ تعلقات کی بھی عکاسی کرتی ہیں۔
انہوں نے اعتماد کا اظہار کیا کہ مشترکہ مشق سے دونوں افواج کے درمیان طبی معاونت کے شعبے میں تعاون مزید مضبوط ہوگا۔
تقریب سے خطاب کرتے ہوئے وو دان نے کہا کہ چینی اور لاؤ افواج نے 2017 سے اب تک چھ مرتبہ اس سلسلے کی مشترکہ مشقیں کی ہیں۔ انہوں نے کہا کہ "پیس ٹرین” طبی ٹیم کی لاؤس واپسی نئے دور میں ہر طرح کے حالات میں چین اور لاؤس کے درمیان مشترکہ مستقبل کی حامل برادری کے قیام کی عملی مثال ہے۔ یہ دونوں افواج کے درمیان نقل وحمل اور طبی معاونت کے شعبوں میں روابط اور تعاون کو فروغ دینے کی بھی ایک اہم کوشش ہے۔
یہ مشق ستمبر کے آخر تک جاری رہے گی، جس میں دونوں جانب سے 700 سے زائد اہلکار حصہ لے رہے ہیں۔
شدید سمندری طوفان سے ہونے والی تباہی کے بعد بین الاقوامی انسانی طبی امداد کے پس منظر میں ہونے والی اس مشق میں تین سطح کی کمانڈ کے ڈھانچے اور چار سطح کے امدادی نظام شامل ہے۔ دونوں ممالک طبی ٹرینوں، فیلڈ میڈیکل آلات اور بغیر پائلٹ کے ذہین آلات کا استعمال کرتے ہوئے مشترکہ تربیت، امدادی کارروائیوں کی عملی مشقیں کریں گے۔
مشق کا مقصد سرحد پار مشترکہ طبی امدادی کارروائیوں کے طریقہ کار کا جائزہ لینا اور دونوں افواج کے درمیان طبی معاونت میں رابطہ کاری اور ہنگامی صورتحال سے نمٹنے کی صلاحیتوں کو مزید بہتر بنانا ہے۔
مشق کے دوران دونوں ممالک طبی خدمات اور ثقافتی تبادلے کی سرگرمیوں کا بھی اہتمام کریں گے۔
