اقوام متحدہ (شِنہوا) اقوام متحدہ کے سیکرٹری جنرل انتونیو گوتریس نے مغربی کنارے میں فلسطینی آبادیوں پر اسرائیل کی جانب سے عائد کی گئی وسیع پیمانے کی پابندیوں پر گہری تشویش کا اظہار کیا ہے۔
اقوام متحدہ کے سیکرٹری جنرل کے ترجمان سٹیفن دوجارک نے کہا کہ الخلیل شہر کے قریب دو اسرائیلی فوجیوں کی ہلاکت کے بعد عائد کی گئی ان پابندیوں سے فلسطینیوں کی نقل و حرکت کی آزادی، بنیادی سہولیات تک رسائی اور روزگار کے ذرائع شدید طور پر محدود ہو گئے ہیں۔
ترجمان کے مطابق گوتریس کو الخلیل میں فلسطینی شہریوں کے گھروں کو مسمار کئے جانے اور ممکنہ طور پر انہیں بے گھر کئے جانے کی اطلاعات پر بھی تشویش ہے۔
ترجمان نے کہا کہ ’’سیکرٹری جنرل 2026 میں اسرائیلی آبادکاروں کی جانب سے فلسطینیوں پر ریکارڈ تعداد میں کئے جانے والے حملوں کے نتیجے میں ہونے والے تشدد کی مذمت کرتے ہیں۔ وہ یاد دلاتے ہیں کہ قابض طاقت کی حیثیت سے اسرائیل پر بین الاقوامی قانون کے تحت یہ ذمہ داری عائد ہوتی ہے کہ وہ فلسطینی آبادی کو ایسے حملوں سے تحفظ فراہم کرے اور ان کے مرتکب افراد کو جواب دہ ٹھہرائے۔‘‘
ترجمان کے مطابق گوتریس کو غزہ میں شہریوں بشمول بچوں کی ہلاکتوں اور موسم سرما کی آمد سے قبل امداد کی فراہمی پر عائد سخت پابندیوں پر بھی گہری تشویش ہے۔
ترجمان نے کہا کہ گوتریس نے شہریوں کے تحفظ کے لئے اپنی ہنگامی اپیل دہرائی ہے۔ انہوں نے تمام فریقوں سے تشدد کی تمام کارروائیاں فوری طور پر روکنے، تحمل کا مظاہرہ کرنے اور ایسے اقدامات سے گریز کرنے کی اپیل بھی کی ہے جو کشیدگی میں مزید اضافے کا سبب بن سکتے ہیں۔
