بیجنگ (شِنہوا) چین نے مصنوعی ذہانت (اے آئی) میں پیش رفت سے ہم آہنگ ہوتے ہوئے روزگار کے فروغ کے لئے نئی ہدایات جاری کی ہیں۔ ان کا مقصد اس ٹیکنالوجی سے فائدہ اٹھاتے ہوئے ملازمتوں کے نئے مواقع پیدا کرنا، روزگار کے معیار کو بہتر بنانا اور کاروباری سرگرمیوں کو فروغ دینا ہے، جبکہ مصنوعی ذہانت کے استعمال کے باعث ملازمتوں میں کمی کے اثرات کو بھی محدود کرنا ہے۔
ریاستی کونسل کے جنرل آفس کی جانب سے جاری ہونے والی ان ہدایات میں 6 شعبوں کے تحت 18 اقدامات تجویز کئے گئے ہیں۔ ان میں مصنوعی ذہانت کے ذریعے روزگار کے مواقع بڑھانا، اس ٹیکنالوجی کے استعمال کو روزگار دوست بنانا، کارکنوں کی ڈیجیٹل مہارتوں کو بہتر بنانا، روزگار کی خدمات کو موثر بنانا، محنت کشوں اور سماجی تحفظ کو مضبوط کرنا اور روزگار کو لاحق خطرات کی نگرانی کرکے ان سے نمٹنا شامل ہیں۔
ان ہدایات میں ابھرتے ہوئے شعبوں میں روزگار کے مواقع بڑھانے، چھوٹے اور درمیانے درجے کے کاروباری اداروں کو ملازمتیں برقرار رکھنے اور ان میں اضافہ کرنے میں مدد دینے، مصنوعی ذہانت کے شعبے میں روزگار اور کاروبار کی نئی شکلوں کو فروغ دینے اور اے آئی سے متعلق نئے پیشوں کو ترقی دینے پر زور دیا گیا ہے۔
ان ہدایات میں روایتی شعبوں میں بھی مصنوعی ذہانت کے ذریعے روزگار کے نئے مواقع پیدا کرنے، اس ٹیکنالوجی کے استعمال سے ملازمتوں میں ممکنہ کمی کے اثرات کو محدود کرنے اور مصنوعی ذہانت اپنانے سے روزگار کو لاحق خطرات کا جائزہ لینے کے لئے ایک نظام قائم کرنے پر زور دیا گیا ہے۔
